Ц.Сандуй /Монголын триатлоны холбооны ерөнхийлөгч/ 84 санал, Т.Амаржаргал /Монголын байт харвааны ерөнхий нарийн бичгийн дарга/66, П.Буяндэлгэр /Чөлөөт бөхийн холбооны ерөнхий нарийн бичгийн дарга/ 65, А.Ганбаатар /Хөлбөмбөгийн холбооны ерөнхийлөгч/ 64, Ч.Амарсанаа /Ширээний теннисний холбооны Удирдах зөвлөлийн гишүүн/ 61, Д.Жаргалсайхан /Оюутны спортын холбооны ерөнхий нарийн бичгийн дарга/ 61 саналаар МҮОХ-ны Гүйцэтгэх зөвлөлд сонгогдлоо

Б.БАТТҮШИГ: ОЛИМПИЙН ХОРООГ ШИЛЭН, НЭЭЛТТЭЙ БОЛГОНО

НЭМЭЛТ:

Ч.Наранбаатар тэргүүн дэд ерөнхийлөгчөөр, О.Одбаяр дэд ерөнхийлөгчөөр сонгогдлоо.

МҮОХ-ны тэргүүн дэд ерөнхийлөгч Ч.НАРАНБААТАР:

-МҮОХ-ны дэд ерөнхийлөгч болон ерөнхийлөгчийн үүрэг гүйцэтгэгчээр нэг жил найман сарын хугацаанд ажиллалаа. Энэ хугацаанд сарын төлөвлөгөө гаргаж, цар тахлын хүнд үед хичээж ажилласан. Өвөл, зуны олимпод тамирчдаа оруулж, чамлахааргүй амжилт гаргаж, олимпийн музейгээ шинэчлэн, хорооны барилгаа засварласан. Одоо бид Парисын олимпиос алтан медаль авах 16 жилийн дараа олимпийн аваргаа төрүүлэх бодлогыг хэрэгжүүлнэ. МҮОХ-ны ерөнхийлөгч Б.Баттүшигтэй хамтарч мөрийн хөтөлбөрөө хэрэгжүүлнэ. Тэрнээс гадна спортын холбоод, Олимпийн зөвлөлийн ажлыг дэмжихээр төлөвлөсөн. Францын Элчин сайдтай уулзсан. Монголын тамирчдыг Францад бэлтгэл хийлгэх, мужуудтай хамтран ажиллах гэрээг ярьсан. Энэ мэт олон ажлыг хийнэ. МҮОХ-ны 180 гишүүнээс тэргүүн дэд ерөнхийлөгчөөр сонгосонд баярлалаа гэж хэлье. Хичээн ажиллах болно.

МҮОХ-ны дэд ерөнхийлөгч О.ОДБАЯР:

-Чуулганд оролцож байгаа гишүүд 98 хувийн саналаар Б.Баттүшигийг сонголоо. Дэд ерөнхийлөгчид найм, тэргүүн дэд ерөнхийлөгчөөр Ч.Наранбаатар сонгогдлоо. МҮОХ гэдэг айлд үе үеийн спортын тамирчн, зүтгэлтнүүд, ивээн тэтгэгчдээс бүрддэг том гэр бүл юм. Энэ гэр бүлийн удирдлагын багт орж ажиллах болсонд баяртай байна. Энэ хавар Биеийн тамир спортын тухай хуулийг УИХ-аар хэлэлцэнэ. Тамирчдын эрх ашгийг хуульд хэрхэн тусгаж, эрүүл мэнд, амьдралын баталгааг хэрхэн хангах вэ гэдгийг тусгуулахаар ажиллана. Тэднийхээ ар тал нь болж ажиллах бодолтой байна.

НЭМЭЛТ:

Олимпийн хорооны дэд ерөнхийлөгчид нэр дэвшигчдийг танилцуулъя. Ч.Амарсанаа /Ширээний теннис/ О.Болд-Эрдэнэ /Жиү жицү/ Ч.Наранбаатар /МҮОХ-ны ерөнхийлөгчийн үүрэг гүйцэтгэгч, дэд ерөнхийлөгч/ О.Одбаяр /Каноэ холбоо/ Ц.Сандуй /Триатлоны холбоо/ С.Тулга /Монголын сагсан бөмбөгийн холбоо/ Д.Энхбаатар /Таеквондогийн холбоо/ Ж.Отгонцагаан нар нэр дэвшиж байна. Эдгээр нэр дэвшигчээс хамгийн санал авсан нь тэргүүн дэд ерөнхийлөгчөөр сонгогдож, удаах санал авсан нь дэд ерөнхийлөгч болно.

НЭМЭЛТ:

Олимпийн хорооны ерөнхийлөгчөөр Б.Баттүшиг сонгогдлоо. Олимпийн хорооны ерөнхийлөгчийн сонгууль дөнгөж сая өндөрлөж, Б.Баттүшиг ялалт байгууллаа. Нийт 151:12 гэсэн харьцаатай Б.Баттүшиг ялжээ. Хоёр санал хүчингүй. Хуралд оролцсон 180 гишүүнээс 165 нь түүнд саналаа өгсөн байна.

МҮОХ-НЫ СОНГУУЛЬ ЭХЭЛЖ, Х.БАТТУЛГА НЭРЭЭ ТАТЛАА

НЭМЭЛТ:

Допингийн эсрэг үндэсний төвийн дарга Ж.ХАТАНБААТАР:

-Бид дөрөвдүгээр сард сэтгүүлчдэд нээлттэй сургалт явуулна. Одоо мэдээлэл өгөхгүй.

НЭМЭЛТ:

МҮОХ-ны Удирдах зөвлөлийн сонгууль хаалттайгаар эхэллээ. Эхлээд ерөнхийлөгчийн сонгууль болох бөгөөд үүний дараа дэд ерөнхийлөгчийн сонгууль болно. Ерөнхийлөгчийн сонгуульд гурван нэр дэвшигч, дэд ерөнхийлөгчийн сонгуульд найман хүн өрсөлдөж байна. Хурлын эхэнд Х.Баттулга нэрээ татлаа.

Б.БАТТҮШИГ: БИ ӨӨРТӨӨ ИТГЭЛТЭЙ БАЙНА

НЭМЭЛТ:

МҮОХ-ны ерөнхий нарийн бичгийн дарга Э.БАДАР-УУГАН:

-Тамирчдын нөхөн сэргээх сувиллыг сэргээхээр япончуудад танилцуулж, судалсан. Тэгэхэд газар нь хувь хүний нэр дээр шилжсэн, МҮОХ-той холбоогүйг олж мэдсэн. Тэгээд зээл авч, худалдаж авсан. Хэдэн төгрөгөөр худалдаж авсан нь хувь хүний нууц. Анх МҮОХ-ны хөрөнгөөр бариагүй ээ. Бүх зүйл шилэн, нээлттэй болсон ч учраас нуух асуудал байхгүй. Тэнд зочид буудал ажиллаж байсан. Би 2008 онд олимпийн үеэр тэр зочид буудалд байрлаж байсан. Би хувь хүнээс худалдаж аваад, өөрийн эмнэлгээ байгуулсан. МҮОХ-нд эмнэлэг, эрдэм шинжилгээний газар байдаг учраас цаашид мэргэжлийн хүмүүс томилогдож, тамирчдын дунд допингийн байнгын сургалтыг хийх нь чухал юм билээ. Миний хувьд клуб байгуулж ажиллах төлөвлөгөөтэй байгаа. Би Боксын холбооны дэд ерөнхийлөгчөөр ажилладаг. Сая Куб улсаас дасгалжуулагч авч ирэхэд анхаарч ажилласан.

НЭМЭЛТ:

МҮОХ-ны тэргүүн дэд ерөнхийлөгч Б.БАТТҮШИГ:

-Чуулганаар сүүлийн таван жилийн хугацаанд хийсэн ажлыг сая танилцууллаа. Үдээс хойшхи хурлаар сонгууль болно. Дараагийн нэр дэвшигчид мөрийн хөтөлбөрүүдээ танилцуулах байх. Сүүлийн таван жилийн тайлангаас дурдвал, Олон улсын үндэсний олимпийн хороо, МҮОХ-ноос Токио, Бээжингийн олимпод тамирчдаа амжилттай оролцуулж, зуны олимпиос дөрвөн медаль хүртлээ. Паралимпиас нэг медаль хүртсэн. Энэ хүнд нөхцөл байдалд маш сайн ажилласан гэж дүгнэж байгаа. МҮОХ-ноос олимпийн эмэгтэй тамирчдад анхаарч ажиллаж байгаа. Хурлын үеэр ганц нэг хүн үзэл бодлоо илэрхийлж байна. Шүүмжлэлтэй, өрсөлдөөнтэй байх нь зөв гэж боддог. Хүн өөртөө итгэлтэй байх хэрэгтэй гэж бодож байна. Би өөртөө итгэлтэй байна.

НЭМЭЛТ:

Монголын Морин Спорт Уяачдын Холбоо/ММСУХ/-ны ерөнхий нарийн бичгийн дарга Ч.ХИШИГБААТАР:

-МҮОХ-ны хурлын зохион байгуулалт сайн байна. Манай холбоо ажлын хэсэгт орж, хуулийн төсөл дээр ажиллаж байна. Шадар сайдад өнөөдөр өргөн барьж, мэргэжлийн холбоодын төлөөлөлтэй 16:00 цагаас баяр наадмын тухай хуулийн талаар уулзана. Бидний зүгээс мэргэжлийн холбооны саналаа тусгаж байгаа.

НЭМЭЛТ:

Монголын сагсан бөмбөгийн холбооны тэргүүн С.ТУЛГА:

-МҮОХ-ны хурал болдгоороо болж байна. Монголд цэвэр агаар хэрэгтэй. Гэвч энд цэвэр агаар алга. Монголын сагсан бөмбөгийн холбоо гурван мандаттай оролцож байна. Манай холбоо энэ хурлын дараа болно. Залуу хүмүүс Монголын спортын салбарт шинэ уур амьсгал оруулж, стандарт тогтоохоор хичээж байна. Бид өөр өөрсдийгөө хуурахгүй. Манай холбооны нэгдсэн Монгол Улсын Ерөнхийлөгчийн зөвлөсний дагуу хурлаа хийхээр төлөвлөж байгаа. Бид тив дэлхийн тэмцээнээс нийт 27 медаль багийн спортоор авсан. Шигшээ багийн цугларалт удахгүй болно. Зөвхөн 3х3 төрлөөр 20 гаруй тэмцээн хүлээж байна.

НЭМЭЛТ:

Биатлоны холбооны ерөнхийлөгч, буудлагын холбооны дэд ерөнхийлөгч Э.МӨНХ-ОЧИР:

-Би огт бухимдаагүй. Бид 2016 онд хуучин 2012 оны дүрмээ шинэчилснээс хойш энэ маргаан үргэлжилж байгаа. Энийг хэлэлцэж, ярилцахыг МҮОХ-ноос хүсээд долоон жил болж байна. Энэ дүрмийг өөрчлөхөөр юу нь болохгүй байгааг гайхаад өдийг хүртэл асуудыг тавьж байна. Олон улсын олимпийн хартын бүтэц бүрэлдэхүүн Монголын МҮОХ-ны бүтэц бүрэлдэхүүн гэсэн заалт ижил байдаг мөртлөө 2.2 заалтад хувь хүн байж болохгүй гэж бий. Хуралд ирсэн хүмүүс МҮОХ-ны гишүүн болно гэдэг өгүүлбэрийг л авъя гэсэн юм. Энэ өгүүлбэр дээр л маргаад байна. Спортын арбитр дээр МҮОХ-ноос маргаанд оролцож, төлбөр төлөхгүй гэдэг хариу өгсөн. Бидэнд маргах зүйл байхгүй гэсэн. Миний хувьд эцсийг нь үзсэн дээр гэж боддог. О.Гүндэгмаагийн допингийн асуудал гадаад үргэлжилж байгаа.

Өнөөдөр үйл ажиллагааг явуулж байгаа хүмүүс хуралд давамгайлж байна. Юм яриулахгүй. Дүрмийн дагуу шаардахаар хариу өгөхгүй байна. Сонгуулийг хэзээ ч явуулж болно. МҮОХ-ны санхүүгийн асуудлаа ярья гэхээр хэлэлцэж өгөхгүй юм.

НЭМЭЛТ:

Олимпийн хорооны ерөнхийлөгчийн сонгуульд нэрээ дэвшүүлсэн Х.Баттулга одоогоор ирээгүй байна. Монголын даамын холбоо дотооддоо маргаантай учир тус холбооны тэргүүн А.Ундрааг олимпийн хорооны гишүүнээс түдгэлзүүлжээ. Э.Мөнх-Очир "Одоогийн олимпийн хорооны удирдлагуудыг дүрмээ биелүүлдэггүй, өнөөдөр сонгууль бус дүрмээ дахин хэлэлцэх хэрэгтэй" гэв.

МҮОХ-ны дэд ерөнхийлөгч Ч.Наранбаатар, Э.Мөнх-Очирын саналыг авч хэлэлцсэнгүй, хурлын гишүүдийг баталлаа. Э.Мөнх-Очир "Тооллогын комиссын гишүүд Удирдах зөвлөлийн сонгуульд өрсөлдөж буй учир тооллогын комиссыг дахин сонгох хэрэгтэй гэв.

ОЛИМПИЙН ХОРООНЫ ШИНЭ ТЭРГҮҮН ӨНӨӨДӨР ТОДОРНО

Монголын үндэсний олимпийн хороо/МҮОХ/-ны ээлжит чуулган өнөөдөр/2022.03.28/ болно. Энэхүү чуулганаар дараах асуудлуудыг хэлэлцэнэ.

1. Мандатын комиссын илтгэлийг хэлэлцэж батлах;
2. МҮОХ-ны сонгуульт хугацааны тайланг хэлэлцэх;
3. МҮОХ-ны Хянан шалгах зөвлөлийн сонгуульт хугацааны тайланг хэлэлцэх;
4. МҮОХ-ны Ерөнхийлөгчийн сонгууль явуулах;
5. Дэд ерөнхийлөгчдийн сонгууль явуулах;
6. Гүйцэтгэх зөвлөлийн гишүүдийн сонгууль явуулах;
7. Хянан шалгах зөвлөлийн гишүүдийн сонгууль явуулах;

Дээрх асуудлуудаас хамгийн анхаарал татаж буй нь ерөнхийлөгчийн сонгууль. Энэ удаагийн МҮОХ-ны ерөнхийлөгчийн төлөө Монгол Улсын ерөнхийлөгч асан Х.Баттулга, тус хорооны тэргүүн дэд ерөнхийлөгч, олон улсын олимпийн хорооны гишүүн Б.Баттүшиг, биатлоны холбооны ерөнхийлөгч З.Мөнх-Очир нар нэрээ дэвшүүлсэн. Эх сурвалжийн мэдээлж байгаагаар Х.Баттулга, З.Мөнх-Очир хоёр нэгдэж, ширээний теннис, гандбол, жүдо, даам, биатлон, буудлага тэргүүтэй холбоод З.Мөнх-Очирын талд орсон сурагтай.

Сунгааны дүнд олимпийн үзүүлэлт чухал нөлөөтэй. Токиогийн олимпийн нэг мөнгө, гурван хүрэл медалийг өөр дээрээ наах гэсэн хүн ч цөөнгүй байгаа.  Бэлэн баг ахлаж явсан гэх утгаараа Б.Баттүшиг гавьяатай юм шиг, МҮОХ-ны ерөнхийлөгчийн үүргийг гүйцэтгэснээрээ Ч.Наранбаатар баатар юм шиг, медаль авсан тамирчид нь бүгд Х.Баттулгатай холбоотой гэхээр эзэн юм шиг том мөнгө тойрсон жижиг дайн хэдийнэ эхэлжээ.  Х.Баттулгын хувьд МҮОХ-г авахаар хуурай дүү Н.Түвшинбаяраа ерөнхийлөгчөөр нь томилсон. Харамсалтай нь, өнөөх нь МҮОХ-ны түүхэнд хар түүхтэй үлдэж байна.