Хятад улсад 2017 оноос хойш Өмнөд Солонгосын контент хаалттай байсан. Тэгвэл таван жилийн дараа буюу шинэ ерөнхийлөгч Юн Сук Ёл сонгогдсоноор тус улс Бээжингийн өргөн нэвтрүүлгийн зохицуулагчаас анхны “K-Drama”зөвшөөрлөө авлаа. Зөвшөөрөгдсөн анхны кино нь “Something in the rain” нэртэй олон ангит юм.

“Something in the rain” кинонд Өмнөд Солонгосын хамгийн өндөр орлоготой жүжигчдийн нэг Сон Е Жин тоглосон. Энэ нь 16 ангитай бөгөөд 2018 оны гуравдугаар сард анх цацагдаж байжээ. Хятадын “Netflix” гэж хэлж болох “iQiyi” платформ нь уг киног гуравдугаар сарын 3-наас эхлэн гаргаж эхэлсэн бол “Bilibili” платформоор мөн сарын 6-наас “Prison playbook” кино гарч эхэлжээ. “Prison playbook” нь цацагдсанаасаа хойш “Bilibili”-ийн үзвэрийн жагсаалтын гуравдугаар байранд орсон байна.

Өмнөд Солонгосын жүжиг, кинонууд олон улсад амжилтаа ахиулсаар Хятадад ийнхүү ирлээ. Цаашид ч Хятадад зах зээлээ тэлнэ гэсэн хүлээлттэй байгаа аж. Өнгөрсөн сард Бээжингийн Өвлийн oлимпийн үеэр гарсан маргаанаас хойш хоёр орны интернэт хэрэглэгчдийн хооронд цахим мөргөлдөөн үүсээд буй. Гэвч Өмнөд Солонгосын олон ангит кинонууд Хятадад хэдийнэ шүтэн бишрэгчидтэй болжээ.

Эх сурвалж: SCMP