Олон улсын геополитикийн нөхцөл байдалтай зэрэгцэн аюулгүй хөрөнгө оруулалтын хэрэгсэл болох алтны үнэ өссөөр байна. Одоогоор зах зээлд алтны спот үнэ унц нь 2050 орчим ам.доллараар арилжигдаж байгаа нь түүхэн дээд түвшиндээ дөхсөн хэмжээ юм.

Тус түүхий эдийн үнэ сүүлийн нэгж жилд 12 хувиар өсөөд байна. Үүнээс өмнө "Goldman sachs" зэрэг Уолл стрийтийн томоохон банкууд алтны үнийн төсөөллүүдээ нэмэгдүүлээд байв.

Манай экспортын гол металлын үнэ өндөр түвшинд тогтвортой хадгалагдах төлөвтэй тул төгрөгийн ханшийг дэмжихээр байна. Учир нь алт нь манай улсын гадаад валютын нөөцийг бүрдүүлэгч нэг чухал хүчин зүйл юм.

Жилдээ 20 гаруй тонн алт худалдан авч, мөнгөжүүлснээр валютын нөөцийг 1 тэрбум гаруй ам.доллараар зузаатгадаг.

Алттай зэрэгцэн мөнгө, зэс зэрэг бусад металл, нүүрсний үнэ өссөн. Тухайлбал, мөнгөний үнэ сүүлийн нэг сард 18 хувиар өсч, унц нь 26 ам.доллар давсан бол зэсийн үнэ 5 хувиар өсч, 10 мянган ам.доллар давсан түвшинд тогтоод байна.

Эдгээр нь манай улсын экспортын голлох түүхий эдүүд учир төлбөрийн тэнцэлд эерэгээр нөлөөлөх бөгөөд төгрөгийн ханш тогтвортой байх суурь хүчин зүйлс гэж шинжээчид үздэг.