“Versace”, “Moschino”, “Michel Kors” зэрэг дэлхийн алдартай олон брэндүүд өнгөрсөн өдрүүдэд 2022 оны намар, өвлийн коллекцоо танилцуулсан. Тэгвэл өдгөө 26 настай супер модель Жижи Хадид загварын долоо хоногоос олсон бүх орлогоо Украины дүрвэгсдэд хандивлахаар болжээ.

Тэрбээр загварын долоо хоногийн зургуудаасаа инстаграмдаа хуваалцаад “Бид өөрсдийн ажлаараа дамжуулан эерэг өөрчлөлтийг бий болгохыг хүсч байна” гэж хэлсэн байна. Украины дүрвэгсдээр зогсохгүй Палестинд байгаа хүмүүст ч цаашид туслах хүсэлтэй байгаагаа илэрхийлжээ.

“Бидний харах нүд, зүрх сэтгэл хэзээд хүн төрөлхтөний шударга бус явдалд нээлттэй байх ёстой. Улс төр, арьс өнгө, шашин шүтлэг үл хамааран бид бүгдээрээ ах дүүс мэт байгаасай. Эцсийн эцэст удирдагчид биш гэм зэмгүй хүмүүс дайны төлөөсийг төлдөг” гэж тэр хэлэв. Хэлсэн үгнийхээ төгсөлд тэрбээр “Украинаас савраа тат. Палестинаас савраа тат. Энх тайван. Энх тайван. Энх тайван” гэжээ.

Жижи Хадид Орос, Украины мөргөлдөөний талаар өнгөрсөн сард ч инстаграм хуудсаараа дамжуулан байр сууриа илэрхийлсэн. Тэрбээр Оросын түрэмгийлэлд сэтгэл дундуур байгаагаа илэрхийлээд, ерөнхийлөгч Владимир Путиныг буруутгаж байв. “Путины энэ үйлдэл дэлхий дахины ардчилсан улсуудыг аюулд оруулж байна. Бусад улс орнууд ч гэсэн юу байна түүгээрээ Украинд туслахыг уриалж байна” гэжээ.

ЭХ СУРВАЛЖ: DAILY MAIL