“Нялх, балчир насны хүүхдийн хөгжлийг дэмжих хөтөлбөр”-ийг Боловсрол, шинжлэх ухааны яам боловсруулж байна.

Тус хөтөлбөр нь бие бялдар, нийгэмшихүй- сэтгэл хөдлөл, хэл яриа, танин мэдэхүй гэсэн харилцан хамааралтай байх бөгөөд эдгээрийн уялдаа холбоонд тулгуурлан нялх, балчир насны хүүхдийн хөгжлийг дэмжих гэнэ. Тодруулбал, хүүхдийн тархины хэмжээ таван нас хүрэхэд 90 хувь нь бүрэлдэн хөгжсөн байдаг учраас хүүхдийн хөгжлийн алтан үе буюу амьдралын эхний 1000 хоногийг чухалчилж үздэг байна.

Хүүхдийн тархины хөгжлийг эрт үеэс дэмжих, насан туршийн эрүүл мэнд, сурч боловсрох үндэс суурийг нялх, балчир насанд тавих нь хувь хүний болон нийгмийн хөгжилд чухал нөлөөтэй.

НИЙГЭМШИХҮЙ-СЭТГЭЛ ХӨДЛӨЛ

Энэ хөгжил нь өөрийнхөө сэтгэл хөдлөлийг таних, удирдах, бусдын сэтгэл хөдлөлийг ойлгох, өөрсдийн зан байдлыг зохицуулах, бусадтай харилцаа тогтоох зэрэг багтана.

БИЕ БЯЛДРЫН ХӨГЖИЛ

Хүүхдийн яс, булчингуудын өсөлт, бэхжилт, хөдлөх, хүрээлэн буй орчиндоо хүрэх чадварыг хэлнэ. Хүүхдийн хөдөлгөөний хөгжил нь том булчингийн, жижиг булчингийн гэсэн хоёр төрөлтэй. Жижиг булчингийн хөдөлгөөн нь гар, хуруугаараа жижиг зүйлийг барих, хөдөлгөх, базах, чимхэх ба эдгээр хөдөлгөөнөө хянана. Том булчингийн хөгжил нь зогсох, мөлхөх, суух, гүйх, алхах гэх мэт орно.

ХЭЛ ЯРИАНЫ ХӨГЖИЛ

Нялх, балчир насны хүүхдийн хэл ярианы ур чадвар нь гурван үе шаттай үйл явцын үр дүнд хөгждөг. Энэ нь үгийг давтан сонсох, танил үгс болон тэдгээрийн төлөөлдөг зүйлийн хооронд холбоо тогтоох, үгийг дуурайх, ярих оролдлого юм. Хэл ярианы хөгжил нь хүүхэд бага наснаасаа хэлийг ойлгож, харилцах үйл явц.

ТАНИН МЭДЭХҮЙН ХӨГЖИЛ

Хүүхэд хэрхэн сэтгэж, судалж, аливааг олж мэдэхийг хэлнэ. Хүүхдүүдэд эргэн тойрон дахь ертөнцийг эргэцүүлэн бодох, ойлгоход тусалдаг мэдлэг, ур чадвар, асуудал шийдвэрлэх, зан чанарыг хөгжүүлэх явдал юм.