"Хөх сувд-2022" мөсний баяр өнөөдөр /2022.03.03/эхэлж буй. Жил бүр уламжлал болгон зохион байгуулдаг энэ баяр цар тахлын улмаас хоёр жил өнжсөн. "Хөх сувд" нь гадаад, дотоодын олон аялагчдын сонирхлыг татдаг Монголын аялал жуулчлалын салбарын хамгийн том арга хэмжээ гэж хэлж болно. Сүүлийн жилүүдэд мөсний баярт сонирхон оролцогч гадаад, дотоодын жуулчдын тоо эрс нэмэгдэж, 15 мянга хүртэлх хүнийг оролцож байв.

Тэгвэл энэ жил "Хөх сувд" мөсний баярт гадаадын жуулчид ирж сонирхохгүй аж.  Энэ талаар Хөвсгөл аймгийн Засаг даргын орлогч М.Хуягбаатараас тодруулахад "Дэлхий нийтэд аялал жуулчлалын салбар хэвийн хэмжээнд ороогүй байна. Үүнтэй холбоотойгоор гадаадын жуулчин олноороо ирэхгүй. Бидний тооцоолсноор нийтдээ 3000 орчим машин ирэх болов уу. Ойролцоогоор 50 орчим жуулчны бааз болон гэр амралтын газрууд ажиллаж байна. Бид энэ жил Хөвсгөл нуураа хамгаалж "Цэнгэгээс цэнгэг, цэвэрээс цэвэр" уриатайгаар ажлаа зохион байгуулж байна. Тийм учраас арга хэмжээнээс олсон орлогоо байгаль хамгаалахад зарцуулах төлөвлөгөөтэй байгаа" гэв.

Мөсний баярыг үзэж сонирхохоор ирсэн автомашинуудаас хураамж авч орлогыг орчны хог хаягдал цэвэрлэх, аюулгүй байдал болон бэлтгэл зохион байгуулалтын хангах зориулалтаар зарцуулна гэдгийг Мөсний баярыг зохион байгуулах комисс мэдээллээ. Тодруулбал суудлын жижиг тэрэг 20, дунд оврын автомашин 30, хүн тээврийн автобусаас 40 мянган төгрөгийн хураамж авах гэнэ.

Энэ жилийн хувьд 20 жилийн ой тохиож байгаагаараа онцлог юм. Тодруулбал, 2014 онд Хөвсгөл нуурын мөс баяр зохион байгуулах хэмжээнд хүрээгүй нимгэн байсан бол 2020, 2021 онд цар тахлын улмаас зохион байгуулаагүй. Энэ жил мөсөн урланг иргэдэд сонирхуулахаар 80 орчим уран бүтээлч ажилласан байна.