Энх тайвныг уриалсан "No War" тайван жагсаал өнөөдөр (2022.03.01) төв талбайд болсон. Энэ үеэр тус жагсаалыг хэсэг бүлэг хүн үймүүлж, маргаан үүсгэжээ. Энэ талаар цагдаагийн байгууллагаас болон жагсаалд оролцогчдоос тодрууллаа.

ЦЕГ-ын Хэвлэл мэдээллийн төвийн дарга Б.БААТАРХҮҮ:

-Тус жагсаал дээр хэсэг залуусын хооронд үзэл бодлын зөрчилдөөн гарч, маргалдахад нь л цагдаагийн алба хаагчид урьдчилан сэргийлэх арга хэмжээ авч, зогсоосон.

Цагдаагийн байгууллага иргэдийн үзэл бодлоо илэрхийлэхэд хүндэтгэлтэй ханддаг. Гэхдээ гол нь хоорондоо маргалдаж байсан уг үйл явдлыг зохицуулах арга хэмжээ авсан.

Жагсаал цуглааны үеэр цагдаагийн алба хаагчид нийгмийн хэв журам зөрчигдөж, эмх замбараагүй байдал үүссэн учраас үүргийн дагуу зохицуулсан. Хэн нэгнийг гэмтээсэн, хорьсон зүйл байхгүй.

"No War" жагсаалыг зохион байгуулагч Д.МОНГОЛХҮҮ:

-Бид хуулийн дагуу Сүхбаатар дүүрэгт тайван жагсаал зохион байгуулах мэдэгдлээ хүргүүлсэн. Гэтэл жагсаалын үеэр хэсэг хүмүүс ирж, үймээн дэгдээсэн. Энэ үед цагдаагийн алба хаагчид үүргийнхээ дагуу нийгмийн хэв журмыг сахиулах арга хэмжээ авсан. Жагсаалын үеэр өөр асуудал үүсээгүй.

Тайван жагсаалд оролцогчид ОХУ, эсвэл Украин гэх хоёр улсын аль нэг талыг баримтлаагүй, гагцхүү даян дэлхий энх амгалан байхыг уриалсан жагсаал улс орон бүрд болж байгаа тул үүнд нэгдсэн гэдгээ илэрхийлсэн.

Жагсаал, цуглааны тухай хуулийн 13 дугаар зүйлд:

• Нийгмийн хэв журам хамгаалах үүрэг бүхий байгууллага нь энэ хуульд заасан журмын дагуу зохион байгуулагдаж байгаа жагсаал, цуглааны үед хэв журам хамгаалж, түүнд оролцогчдыг аливаа гэмт халдлагаас хамгаалах үүрэгтэй.
• Жагсаал, цуглааны явцад хэв журам хамгаалах нэмэгдэл арга хэмжээ шаардлагатай бол зохион байгуулагч нь энэ тухай хүсэлтээ цагдаагийн байгууллагад гаргана хэмээн тус тус заажээ.