Мэргэжлийн уран бүтээлчдээс бүрдсэн "Орфей" театр Оросын зохиолч Фёдор Михайлович Достоевскийн 200 жилийн ойд зориулан "Гэм зэм" романыг постдрам жүжиг болгон, өнгөрсөн оны арваннэгдүгээр сард амжилттай тоглосон. Урлаг судлаач шүүмжлэгч нараас өндөр үнэлгээ авсан тус жүжгийг үзэгчдийн хүсэлтээр энэ оны гуравдугаар сарын 3-наас 27-ны өдрийг дуустал тоглох юм.

Тус театрын хамт олон залуусын ёс суртахуун, хүмүүжил, урлагийн боловсролд хувь нэмэр оруулах, EQ буюу сэтгэл хөдлөлийн оюун ухааныг хөгжүүлэх, нийгмийн сэтгэл зүйд эерэг нөлөөлөл үзүүлэх зорилгоор “I STUDENT” төслийг санаачлан, хэрэгжүүлэх гэж байна. “I STUDENT” төслийн эхний ажил болгон "Орфей" театрын "Гэм зэм" жүжгийг Монгол Улсын төрийн болон хувийн бүх их, дээд сургуулийн оюутнуудад хүргэх зорилгоор, 50 хувийн хөнгөлөлттэй үнээр үзэх боломж бүрдүүлжээ.

Ц.ХОНГОР