Хэнтий аймгийн Батноров сумын долдугаар багийн Бэрх тосгонд жонш олборлох уурхайд нуралт болж, нэг хүн нас баржээ. Ослын дуудлага өнгөрсөн шөнө 00:58 цагийн үед онцгой байдлын газарт бүртгэгдсэн байна.

Энэ талаар Батноров сум дахь Онцгой байдлын газраас тодруулахад  “Бэрх тосгонд жонш олборлох уурхайд нуралт болж нэг хүн шороонд дарагдсан тухай дуудлага ирсэн. Энэ дагуу Гал түймэр унтраах, аврах 42 дугаар анги, Эрэн хайх, аврах салбарын алба хаагчид 70 км замыг туулан очиход нэг хүн осолдож амь насаа алдсан байсан. Харин уурхайд ажиллаж байсан долоон хүн ямар нэгэн бэртэл аваагүй эсэн мэнд байгаа. Уг нь жоншны уурхай аюулгүй байдлаа хангасан байсан” гэлээ.

Онцгой байдлын ерөнхий газрын мэдээлснээр ослын дуудлагын дагуу аврах багийнхан “Баялаг Бэрх” нөхөрлөлийн жоншны уурхайн ажилтан 53 настай иргэн бэхэлгээ хийж байгаад нас барсан байсныг гаргаж цагдаагийн байгууллагад шилжүүлсэн байна.