Тансаг зэрэглэлийн автомашинууд дүүрэн ачсан тээврийн хөлөг онгоцонд гал түймэр гарчээ. Тиймээс хөлгийн багийнхан яаралтай зугтаж, усан онгоц одоогоор Атлантын далайд эзэнгүй тэнүүчилж яваа ажээ. Тодруулбал, уг хөлөг онгоц Германы Эмден хотоос Род-Айлендын Дэвисвилл хот руу Порше, Вольксваген зэрэг автомашинуудыг тээвэрлэж явсан аж. “Felicity Ace” нэртэй энэхүү хөлөг онгоц нь 200 метр орчим урттай бөгөөд 17 мянган тонн ачаа тээвэрлэх чадалтай.

Гал гарах үед хөлөг онгоц Португалийн Азор арлаас баруун өмнө зүгт 166 километр орчим зайтай явж байсан гэж тус улсын тэнгисийн цэргийн хүчнээс мэдээлэв. Ачааны агуулахад гарсан гал газар аван цааш тархаж, багийн 22 гишүүн бүгдээрээ хөлөг онгоцоо орхихоос өөр аргагүй байдалд хүрчээ. Понта Делгада нэртэй аврах ажиллагаа зохицуулах төвийн ажилтнууд багийнхнийг орон нутгийн зочид буудалд аюулгүй хүргэсэн. Одоогоор гал түймрийн улмаас үүссэн хохирлыг бүрэн тооцоолж дуусаагүй байна. Усан онгоц Лхагва гаригт шатаж эхэлснээсээ хойш гал нь бүрэн унтраагүй л байгааг CNN өчигдөр мэдээллээ.

"Porsche" болон "Volkswagen" компанийхан усан онгоцон дээр байсан машинуудын захиалагчидтай холбогдож, цаашид хэрхэх шийдлийг олоход чадах чинээгээрээ дэмжинэ гэжээ. Яг юу болсон хийгээд цаашид хэрхэхийг одоогоор мэдээлэхэд арай эрт байна гэж "Porsche"-гийн PR хариуцсан дэд ерөнхийлөгч Ангус Фиттон хэллээ.

Хөлөн онгоцонд байсан машинуудын дунд хөтлөгч, продюсер Мэтт Фарагийн 2022 оны Porshe Boxster Spyder машин байжээ. Мэтт Фара нь “The smoking tire” нэртэй машины нэвтрүүлгээрээ алдартай.

Эх сурвалж: CNN