“Бээжин-2022” өвлийн паралимпийн наадамд эх орноо төлөөлөн өрсөлдөх Монгол тамирчдын нэрс эцэслэн баталгаажлаа. Гүйлтийн цанын төрөлд Б.Ганболд өрсөлдөх эрхээ аваад байгаа бол өчигдөр/2022.02.15/ 17:00 цагийн орчимд Ц.Дашдоржийн паралимпийн наадамд оролцох эрх албан ёсоор баталгаажив. Ингэснээр Б.Ганболд, Ц.Дашдорж нар “Бээжин-2022” өвлийн паралимпийн гүйлтийн цанын холын зайн 20 км, дундын зайн 10 км, спринт гарааны 1.2 км-ын зайд уралдахаар боллоо.

Тэд гүйлтийн цанын ДАШТ-д хоёр, Дэлхийн цомд гурван удаа оролцож, дээрх нормативыг биелүүлжээ. Ц.Дашдорж паралимпод анх удаа оролцох гэж буй нь энэ. Харин Б.Ганболд “Сочи-2014”, “Пёнчан-2018”-д оролцож, “Бээжин-2022” гээд гурав дахь паралимпдоо өрсөлдөх гэж байна. Монголын гүйлтийн цанын паралимпийн эрх авсан баг тамирчдыг Үндэсний шигшээ багийн ахлах дасгалжуулагч Ж.Дашдондог удирдан бэлтгэл сургуулилтаа хангаж байна.