Өмнөд Солонгосын ерөнхийлөгчийн ээлжит сонгууль гуравдугаар сарын 9-нд болно. Харин албан ёсны сонгуулийн сурталчилгааны хугацаа өчигдөр /2022.02.15/ эхэлсэн бөгөөд 22 хоногийн турш үргэлжилнэ. Эрх баригч либерал нам болон Консерватив сөрөг хүчний нам хооронд гадаад бодлогын санал зөрөлдөөн үүсээд буй учраас тус улсын сонгууль хэрхэхийг олон улс анхааралтай ажиглаж буй.  Сонгуулийн насны 44 сая хүн байгаагаас 29.5 хувь нь 60-аас дээш насны сонгогчид юм. 2017 онд энэ тоо 27.3 хувь байсан.

Ерөнхийлөгчид нэр дэвшихээр хамгийн багадаа 11 нэр дэвшигч Үндэсний сонгуулийн хороонд бүртгүүлжээ. Либерал ардчилсан намаас Ли Жэ Мюн, Консерватив сөрөг хүчний намаас Юн Сүк Ёл нар нэр дэвшиж байгаа бөгөөд ялах магадлал хамгийн өндөртэй нэр дэвшигчид юм.

Өдгөө 57 настай хүний эрхийн хуульч, Кёнги мужийн захирагч асан Ли Жэ Мюн нь бага насандаа ядуу зүдүү амьдрал туулж, үйлдвэрт ажиллаж байсан түүхтэй. Тийм учраас залууст зориулсан нэг сая воны буцалтгүй тусламж гэх мэт нийгмийн халамжийн төслүүдийг зоригтой дэмжиж ажиллахаа илэрхийлсэн.

Тэгвэл гол өрсөлдөгч болох Юн Сүк Ёл нь 27 жил улсын яллагчаар ажилласан бөгөөд ерөнхийлөгч асан Ли Мён Бак, Пак Гын Хэ нарыг шоронд хоригдоход голлох үүрэг гүйцэтгэжээ. Хоёр хуучин ерөнхийлөгчийг шийтгэж, тэдний эсрэг зогссоноороо Юн Сүк Ёл нь иргэдийн дунд шударга ёсны төлөө тэмцэгч дүр төрхийг бүрдүүлж чадсан байна.

Дээрх хоёр нэр дэвшигчээс гадна эмч мэргэжилтэй ч улс төрөөр замнаж буй Ан Чеол Су нь хүчтэй өрсөлдөгчид тооцогдож байна. Бусад найман нэр дэвшигчийн хувьд Шударга ёс намын Сим Сан Жун, Эдийн засгийн сайд асан Ким Дун Ён зэрэг хүмүүс багтжээ.

Эх сурвалж: SCMP