Олон улсын олимпийн хорооны Соёлын өвийг хамгаалах сангаас тавьсан хүсэлтийн дагуу “Бээжин-2022” олимпийн наадмын нээлтэд өмссөн тамирчин Б.Ачбадрахын үндэсний дээл, малгайг Швейцарь улсын Лозанн хотноо байрлах ОУОХ-ны Олимпийн музейд хандивлахаар боллоо. Манай тамирчин хаалтын ёслолд дээлээ өмсөөд маргааш нь Олимпийн музейд хүлээлгэн өгөхөөр тохирсон аж.

Түүнчлэн Монголын үндэсний олимпийн хорооны /МҮОХ/-ны удирдлагууд Олон улсын олимпийн хороо/ОУОХ/-ны Үндэсний олимпийн хороод болон Эв санааны нэгдлийг хариуцсан захирал Жеймс Маклеод, ҮОХ-дын харилцааны албаны Байгууллагын харилцаа ба засаглал хариуцсан захирал Жероме Поуэ нартай уулзаж, хамтын ажиллагааны талаар санал солилцжээ.

МҮОХ нь байгууллагын гадаад харилцаагаа өргөжүүлэх, олон улсын хурал, сургалт семинарыг Улаанбаатар хотноо зохион байгуулах хүсэлтээ илэрхийлж, цаг үеийн бусад асуудлаар санал солилцсон гэнэ.