Бээжин-2022 өвлийн олимпийн эрэгтэйчүүдийн уран гулгалтын богино үзүүлбэр өнөөдөр/2022.02.08/ боллоо. Натан Чен ч Бээжингийн мөсөн талбайд гал шиг дүрэлзлээ. Өдгөө 22 настай, америк залуу дэлхийн рекордыг шинэчлэн тогтоож, 113.97 оноо авав. Сүүлийн гурван дэлхийн аваргад дараалан түрүүлээд буй тэрбээр дөрвөлсөн флип, гурвалсан аксель, каскад дөрвөлсөн лутц, гурвалсан тулуп гүйцэтгэж, Юзүрү Ханюгийн тогтоосон дэлхийн рекорд болох 111.82 оноог эвджээ.

Канадын “СВС” телевизийн тайлбарлагч Натан Чен үзүүлбэрийн үеэр “Тэр дэлхийн рекордыг эвдсэнгүй. Тэр бүр нунтаглаад хаячихлаа” гэжээ.

Гэхдээ ажил дуусаагүй. Чөлөөт үзүүлбэр ирэх Пүрэв гаригт болно. Натан Чений араас 108.12 оноотой Японы Юма Кагияама, 105.90 оноотой Шома Үно нар бичигдэж байна. Харин сүүлийн хоёр олимпод дараалан түрүүлээд буй “Мөсний хаан” Японы Юзүрү Ханю хүлээлтэд хараахан хүрсэнгүй, 95.15 оноо авчээ. Харин Оросын битүү морьд болох Евгения Семененко 95.76 оноотой долдугаарт, энэ жилийн Европын аварга Марк Кондратюк 15-рт тус тус жагслаа.

Мэргэжилтнүүд уран гулгалтын ганцаарчилсан төрлийн алтан медалийн төлөөх гол өрсөлдөөн Юзүрү Ханю, Натан Чен нарын хооронд болно гэж таамаглаж байсан ч Натан Чен хол тасарчихлаа.