“Дубай экспо-2020” олон улсын үзэсгэлэнд оролцож буй Монгол Улсын асарт АНЭУ-ын Гадаад харилцааны сайд Шейх Абдулла бин Зайд зочилж, асарт дэлгэсэн үзмэрүүдийг үзэж сонирхжээ.

Тэрбээр зураач Н.Сэргэлэн, С.Ганзам, Ш.Сайнзул, Н.Хосбаяр нарын бүтээсэн “Дэлхийн нэг өдөр” бүтээл болон XVIII зуунд монгол бичгээр бичсэн 495 хуудастай “Данжуур" судрыг ихэд сонирхсон байна. Шейх Абдулла бин Зайд "Монгол бичиг араб бичигтэй тун төстэй харагдаж байна" гэжээ.

“Дубай эскпо-2020” үзэсгэлэн ирэх гуравдугаар сарыг дуустал үргэлжлэх бөгөөд өнөөдрийн байдлаар Монгол Улсын асарт 150 мянга гаруй үзэгч зочлоод байгаа аж.

Дашрамд дурдахад, АНЭУ-ын угсаа залгамжлах ханхүү, Дубайн Гүйцэтгэх зөвлөлийн дарга Шейх Хамдан бин Мохаммед бин Рашид Аль Мактум нар өнгөрсөн 2021 оны аравдугаар сард Монголын асарт зочилж байжээ.