Өвлийн олимпийн нээлт болсон хоёрдугаар сарын 4-ний өдөр мөстэй усан сэлэлтийн дөрөв дэх удаагийн дэлхийн аварга эхэлжээ. Хоёр жил тутам зохион байгуулдаг энэ тэмцээн өнгөрсөн жил цуцлагдаж, энэ жил Польш улсын Глоков хотод болов. Энэ тэмцээнд Монгол Улсаа төлөөлөн Ш.Даваадорж оролцож, 28 улсын тамирчидтай өрсөлдөн мэлхий болон эрвээхий сэлэлтээр мөнгө, хүрэл медаль хүртлээ.

Усан сэлэлтийн дөрөв дэх удаагийн дэлхийн аварга нь 50, 100, 250, 500, 1000 метрийн чөлөөт сэлэлт, 50, 100 метрийн мэлхий, 50 метрийн араар даллах, 50 метрийн эрвээхий, 100 метрийн ганцаарчилсан, холимог сэлэлтийн төрлүүд, түүнчлэн холимог 4×50 ба 4×250 метрийн чөлөөт буухиа гэсэн төрлүүдээр болжээ.

Усны температур таван хэм байсан бөгөөд Глоков хотын цаг агаар 7-10 хэмийн хооронд байжээ.

2009 онд байгуулсан IISA буюу Олон улсын мөсөн сэлэлтийн холбоо нь нийт 73 гишүүн оронтой бөгөөд ихэнхи нь Европын орнууд аж.