Сноубордын слоупстайлын төрлийн тэмцээн өнөөдөр/2022.02.06/ эхэлж, эмэгтэйчүүдийн төрөлд Зои Садовски-Синнотт 92.88 оноо аван тэргүүлж, алтан медаль хүртлээ. Ингэснээр Шинэ Зеландаас анх удаагаа өвлийн олимпийн аварга төрж байна. Өдгөө 20 настай тэрбээр финалын шатандаа 1080 эргэж, цугласан олныг алмайруулжээ. Харин мөнгөн медалийг Америкийн тамирчин Жулиа Марино, хүрэл медалийг Тесс Коади тус тус хүртжээ.

Зои Садовски-Синнотт 2018 оны олимпод “Big Air” төрлөөс хүрэл медаль хүртэж байжээ.

Шинэ Зеландын дэд сайд Грант Робертсон тамирчиндаа баяр хүргэн өөрийн цахим хуудаснаа “Зои алтан медаль хүртлээ. Дөрвөн жилийн өмнө түүнийг хүрэл медаль хүртэхийг хажуунаас харж байлаа. Тэр цагаас хойш Зои дэлхийн шилдэг сноубордын тамирчдын нэг болжээ. Бидний өвлийн олимпийн анхны алтан медаль. Энэ гайхалтай эмэгтэйгээр бахархаж байна. Вайтанги баярын мэнд хүргэе” гэжээ.

Өнөөдрийн байдлаар Норвеги улс хоёр алтан медаль хүртсэн амжилтаараа багийн дүнг тэргүүлж байгаа бол тэдний араас нэг алт, нэг хүрэл медальтай Словени, нэг алтан медальтай Хятад, Нидерланд улсууд удаалж байна.