Бээжингийн өвлийн олимпод оролцож буй тамирчид болон холбогдох бусад хүмүүсийн дундаас өнгөрсөн дөрөв хоногийн хугацаанд Covid-19-ийн 119 тохиолдол илэрчээ. Тамирчид, ажилчид, хэвлэл мэдээллийнхнийг олон нийтээс тусгаарлахын тулд хаалттай бүс үүсгэн ажиллаж байна.

Амралтын өдрүүдийн тооллогоор Ням гаригт 37, Бямба гаригт 34 шинэ тохиолдол бүртгэгджээ. Ихэнх нь нисэх онгоцны буудалд ирснийхээ дараа эерэг гарсан гэж наадмын зохион байгуулагчид мэдэгдэв.

Оросын багаас гурван эерэг хариу гарсан. Тэдний нэг болох биатлонч Валерия Васнецова хэлэхдээ “Бээжинд ирээд хоёр удаа шинжилгээ өгөхөд хоёулаа эерэг хариу гарснаар миний олимп ийнхүү дууслаа” гэжээ. “Миний олимпийн мөрөөдөл ингээд мөрөөдөл хэвээрээ л үлдэх нь” гэж цахим хуудсандаа тэрбээр бичсэн байна.

Олон улсын олимпийн хорооны гишүүн бөгөөд өдгөө зодог тайлсан Финляндын хоккейчин Эмма Терхо мөн эерэг гарсан. Тэрбээр   “Энэ миний төсөөлж байсан эхлэл биш ч гэсэн Бээжингийн олимпийн зохион байгуулалт ийм сайн байгаад баяртай байна” гэжээ.

Хоёрдугаар сарын 4-нөөс 20-ны хооронд зохион байгуулагдах өвлийн олимпод тамирчид, дасгалжуулагч, албаны хүмүүс, шүүгч, холбооны төлөөлөгч, хэвлэл мэдээлэл гээд нийт 3000 хүн оролцож байна.

Эх сурвалж: REUTERS