НЭМЭЛТ:

Сар шинийн баярт зориулсан хүчит 256 бөхийн барилдаан өнөөдөр/2021.01.31/ эхэллээ. Энэ жилийн барилдаан хоёр өдөр үргэлжлэх бөгөөд эхний өдөр олон гайхалтай барилдаан гарч, үзэгч олны мэлмийг баясгалаа.

Нэгийн даваанд улсын харцага Н.Батзаяа, Ж.Амартүвшин, улсын начин Ж.Чулуунбат, Ш.Шинэбаяр, Г.Баасандорж, Б.Ганхуяг, Б.Дэлгэрсайхан, Т.Дүгэрдорж тэргүүтэй улсын цолтнууд өвдөг шорооджээ.

Харин хоёрын даваанд улсын гарьд Ж.Бат-Эрдэнэ, улсын заан М.Өсөхбаяр, улсын харцага Ш.Уламбаяр, Н.Золбоо, Ш.Мөнгөнбаатар, Б.Цэдэнсодном, Ш.Пүрэвгарьд, улсын начин Б.Суманчулуун, Л.Гантулга, Ч.Баянмөнх, Б.Сангисүрэн, Э.Даш, Б.Баатарцол, Ц.Чимэддорж, Г.Ганжад, Х.Цогтгэрэл тэргүүтэй улсын цолтнууд унажээ.

Сар шинийн барилдаан маргааш/2021.02.01/ 14:00 цагаас үргэлжилж, түрүү бөх тодорно. Анхааруулахад, бөхчүүд болон үзэгчид барилдааны өмнө Covid-19-ийн түргэвчилсэн шинжилгээнд үнэгүй төлбөр хамрагдах ёстой.

Даян аварга Н.Батсуурь өнөөдөр/2021.01.31/ эхлэх сар шинийн уламжлалт барилдаанд зодоглохоо Монголын үндэсний бөхийн холбоонд мэдэгдсэн ч түүнийг бүртгэх боломжгүй гэж тус холбооны үзсэн. Үүний эсрэг Н.Батсуурь өөрийн цахим хуудаснаа "Маргааш барилдана. Хууль ёсны дагуу" хэмээн бичсэн бий. Үүний улмаас бөх сонирхогчид, үзэгчдийн зүгээс сар шинийн барилдаан бас "бойкотод" орох вий гэж болгоомжилж байгаа юм. Учир нь, саяхан  улсын харцага цолны хүндэтгэлийн барилдааныг зохион байгуулахаар товлосон боловч Н.Батсуурийг барилдуулахгүй гэж хэсэг бөхчүүд эсэргүүцсэнээс болж үл ойлгоцол үүссэн төдийгүй, барилдааныг цуцалсан юм.

Н.Батсуурь допингийн шинжилгээний хариугаа орчуулан олон нийтэд дэлгэж, хориотой бодис “very low” буюу маш бага илэрсэн гэдгийг тодотгосон.

Монголын үндэсний бөхийн холбооны тэргүүн Ц.Магалжав өчигдөр энэ талаар ярихдаа “Маргаашийн сар шинийн барилдаанд Н.Батсуурь аварга, Р.Пүрэвдагва арслан, Ө.Бат-Орших нар барилдахгүй. Битүүний барилдаан бол бэлгэдлийн барилдаан. Тиймээс  допингийн шийтгэл буруу, зөвийн асуудал нь  тусдаа. Үүн дээр бид бүхэн ойлголцсон. Н.Батсуурь аварга өнөөдөр 11:00 цагийн үед надтай ярьсан. Дараагийн барилдаануудад барилдуулахыг тэргүүлэгчдийн хурлаараа шийдээд өгөөрэй гэх хүсэлтийг тавьсан. Тэргүүлэгчид энэ барилдаанд өнжүүлье гэж шийдсэн” гэв.

Сайжруулагч хэмээх усан бар жилийн сар шинийн баярт зориулсан барилдаанд зодоглохоор улсын аварга П.Бүрэнтөгс, улсын арслан Ц.Содномдорж, улсын гарьд Б.Гончигдамба тэргүүтэй 270 бөх бүртгүүлжээ. Сүүлийн барилдаанууд зодоглоогүй байсан улсын гарьд Ш.Жаргалсайхан, улсын заан М.Өсөхбаяр, улсын харцага Н.Батзаяа, улсын харцага Б.Орхонбаяр, улсын харцага Ш.Мөнгөнбаатар зэрэг бөхчүүд энэ удаад барилдах аж.

Барилдаан хоёр өдөр үргэлжлэх бөгөөд эхний өдөр буюу өнөөдөр нэг, хоёрын даваа явагдаж, маргааш өндөрлөнө.