Эрүүл мэндийн яамнаас долоо хоног бүрийн Баасан гаригт Covid-19 цар тахлын нөхцөл байдлын талаар мэдээлэл хийдэг. Өнөөдөр /2022.01.21/-ийн хуралдаанаар омикрон хувилбарын хүндрэл болоод эрсдэлийн талаар нэгдсэн мэдээлэл өглөө.  

ХӨСҮТ-ийн захирал Ц.БИЛЭГТСАЙХАН: 

-Дэлхий дахинд 318 сая хүн Covid-19 цар тахлын халдвараар өвдөөд байна. Европын холбоо, АНУ зэрэгт өвчлөл өндөр байна. Омикрон хувилбар 149 оронд бүртгэгдсэн бөгөөд халдварын тархалт өдөр ирэх бүр ихэсч байна. Нийт илэрч байгаа тохиолдлуудаас мэдрэг буюу PCR шинжилгээгээр илэрсэн тохиолдлыг батлагдсан гэж үздэг. ХӨСҮТ-өөс хийсэн тандалт судалгаагаар ажлын байр, гэр бүлээс халдвар авах тохиолдол өндөр байна. Мөн олон нийтээр үйлчлүүлдэг газраас халдвар авах эрсдэл 65 хувь болж өслөө. Хүүхдийн өвчлөл 21.7 байгаа бөгөөд 0-4 насны хүүхэд 26 хувь, 5-11 насны хүүхэд өвчлөх нь 43 хувь байна. Тиймээс халдварын тархалт вакцингүй бүлэг рүү чиглэх нь дельта хувилбараас илүү байгаа юм. Тиймээс дархлаажуулалтын үйл явцыг эрчимжүүлэх шаардлагатай байна. Цагаан сарыг гэр, гэртээ тэмдэглэхийг уриалж байна.

Вирусийн хувилбарын тандалтын тухайд нийт зөөвөрлөгдсөн 12, дотоодод батлагдсан таван тохиолдол байсан. Харин өнөөдөр NGS шинжилгээгээр зөөвөрлөгдсөн 13, дотоодын зургаан тохиолдол бүртгэгдээд байна.

Эрүүлийг хамгаалах гавьяат ажилтан А.АМБАСЭЛМАА:

-Монгол Улсад өдрөөс өдөрт бүртгэгдэх халдварын тоо 2-3 дахин өсч байна. Үүнийг дагаад эмнэлгийн ачаалал нэмэгдэж, орны нөөцийн асуудал яригдаж байгаа юм. Тиймээс ард иргэд хариу арга хэмжээ авч, хувийн халдвар хамгааллыг маш сайн сахих ёстой. Тохиолдлын тоо нэмэгдэхийн хэрээр хүнд болон нэн хүнд хүмүүсийн тоо өсч байна. Өвчлөлийн тархалт олон хүнийг хамарч тархаж байна. Иймд вакцинаа заавал хийлгэхийг зөвлөж байна.

ХӨСҮТ-ийн эмнэлгийн тусламж хариуцсан дэд захирал Ц.ЧИНБАЯР:

-Халдварын тохиолдлуудын 91 хувь нь омикрон хувилбар байна. Эдгээрээс биеийн байдал хүнд хүн 10 хувийг эзэлж байна. Тиймээс хавсарсан өвчтэй хүмүүс Covid-19-ийн омикрон хувилбараар өвдөхгүй байх нь чухал. Хэрэв суурь өвчтэй хүн өвдвөл биеийн байдал нь богино хугацаанд хүндэрч байна.