Д.Монголхүүг оргуулсан гэх хэргийг прокурорт буцаажээ

Хуулийн өмнө хүн бүр эрх тэгш байхыг шаардаж буй "Nodoublestandart" хөдөлгөөний Э.Одбаяр, Г.Ган-Очир, Ц.Чинбат, Б.Билгүүн, Л.Ганхөлөг, Б.Бямбагэрэл нарын зургаан хүн цагдан хорих 461 дүгээр ангид халдаж, хүч хэрэглэн хүн оргуулсан гэх шүүх хурал өчигдөр /2022.01.20/ Баянгол дүүргийн Эрүүгийн хэргийн анхан шатны шүүхийн байранд болсон. Шүүхээс тэдэнд холбогдох хэргийг прокурорт буцаах шийдвэр гаргасан талаар Э.Одбаяр мэдээллээ.

Шүүх хурлын урьдчилсан хэлэлцүүлэг нэгдүгээр сарын 5-нд Баянгол дүүргийн Эрүүгийн хэргийн анхан шатны шүүхийн байранд болж, шүүх хурлын товыг зарласан. Тэднийг гурван жил хүртэл хорих ялтай эрүүгийн хэрэгт буруутгаад байгаа юм.

Э.Одбаяр нарын зүгээс Д.Монголхүүг Э.Одбаяр биш 461 дүгээр ангийн ажилтнууд өөрсдөө өргөж авч гарсан талаарх бичлэгийг олон нийтэд цацсан байна. Уг бичлэгт энгийн хувцастай цагдаа гэх хүмүүс Д.Монголхүүг хууль бусаар баривчилж, шийдвэр тогтоолгүй 461 дүгээр ангид нууж байгаад баригдсан. Цагдан хорих 461 дүгээр ажилтнууд ингэж хууль бусаар хүн хорих боломжгүй учир "Эндээс бүгд гар" гэтэл энгийн хувцастай цагдаа гэх хүмүүс гаргахгүй, бужигнаан үүсгэж, өөрсдөө хорих ангийн ажилтнуудыг эсэргүүцсэн байдаг. Мөн 461 дүгээр ангиас ямар ч хүн оргуулж гаргаагүй гэдгээ ШШГЕГ-ын удирдлагууд мэдэгдсэн талаар тайлбарлав.

Иргэн Э.Одбаяр өмнө нь мэдээлэхдээ "ЦЕГ-ын дарга Ж.Болд "Э.Одбаяр нарын хүмүүс иргэн Д.Монголхүүг 461 дүгээр ангиас "өргөж" авч явсан" гэж хэлсэн. Тэрийг нь гэрчлэх хорих ангийн үүдний хүлээн авах заалны хяналтын камерын нийт есөн бичлэг байсан. Гэтэл хэргийн нотлох баримтаас нэг ширхэг CD алга болчихлоо. Үлдсэн CD-ний бичлэгүүдэд дутуу хагас, бараг хоосон шахуу, ач холбогдолгүй бичлэг байна. Бид хэдий хэрэгт яллагдагчаар татагдаж байгаа ч өөрсдийнхөө гэм буруугүйг нотлох баримтыг тэгш эрхтэйгээр хангуулах хуулийн заалттай. Гэтэл хуулийн байгууллагаас зөвхөн нэг талыг баримталж, биднийг буруутай гэж харуулсан хэсгийг нотлох баримтаар оруулж байна. Бичлэгийн зарим хэсгийг цаасан дээр хэвлээд гаргасан байна лээ. Алга болсон CD дотор Д.Монголхүүг хэн хорих ангиас авч явсан бэ, түүнийг өргөж авч гарсан юм уу, үгүй юу гэдгийг тодорхой харуулсан юм.

Шүүх хурлын урьдчилсан хэлэлцүүлэг өчигдөр болж, шүүх хуралд нотлох баримт бүрэн байна уу, шүүх хуралд ороход бэлэн үү гэдгийг хэлэлцсэн. Бидний зүгээс энэ асуудлыг судалж, алга болсон хавсралтуудыг мөрдөн байцаах ажлын хэсгээс гаргуулах санал тавьсан. Мөн 461 дүгээр хорих ангийн үүдэнд ажиллаж байсан шүүхийн шийдвэр гүйцэтгэхийн ажилтан албан хаагчдын ажлын тэмдэглэлээ дарга нартаа юу гэж танилцуулсан гэх мэт асуудлуудаа тодорхой болгож, шаардлагатай бол гэрчээр оролцох хүмүүсээ нэмж, хоёр талын байр суурийг тэнцвэртэй болгох санал тавьсан. Гэтэл шүүхийн байгууллагаас 2022 оны нэгдүгээр 20-ны өдөр 08.30 цагт шууд гэм буруутай эсэх шүүх хурлаараа энэ асуудлыг хэлэлцэхээр шүүх хурлын товыг зарлачихсан" гэж хэлж байв.