“CD”-ний борлуулалт эргэн ирэхэд хэн нөлөөлөв?

“CD”-ний борлуулалт өнгөрсөн онд өсөлт сайтай байлаа. 17 жилийн дараа анх удаа “CD”-ний борлуулалт өсч буй нь энэ юм.

Энэ өсөлтийн гол эзэн нь дуучин Адель байв. “30” нэртэй түүний шинэ цомог 898 мянган ширхэг борлогджээ. Аделийн араас Тэйлор Свифт, “BTS” нар удаалав. Улам улмаар цахимжиж буй эрин үеийнхэн гарт баригдахуйц бодит мэдээллийн хэрэгсэлд улам татагдаж эхлэв үү. “CD” буюу компакт дискэнд хүнийг татах ямар нэг увдис байх шиг.

Компакт дискний оргил үе 2000-аад он байсан. Тухайн үед “NSync” хамтлагийн “No strings attached" цомог худалдаанд гарсан эхний долоо хоногтоо 2.4 сая ширхэг борлуулагдаж, дээд амжилт тогтоож байжээ.

Анхны компакт дискийг 30х15 см хэмжээтэй картон хавтанд савладаг байсан. Энэ нь хулгайн гэмт хэргээс сэргийлэхээс өөр онц зорилгогүй байжээ. Тухайлбал, “Spinal tap” хамтлагийн 1992 онд гаргасан цомог 45 см орчим урттай хавтанд савлагдаж байжээ.