Мэргэжлийн сүмо бөхийн Хацү башёгийн арав дахь өдрийн барилдаанууд өчигдөр /2021.01.18/ Токио хотын Рёогокү Кокүгикан ордонд боллоо. Энэ өдөр ёкозүна Тэрүнофүжи Г.Ган-Эрдэнэ маэгаширагийн тавдугаарт эрэмбэтэй Оношотой барилдаж, ес дэх даваагаа авлаа.

Харин башёг нэг ч унаагүй тэргүүлж явсан Митакэүми маэгаширагийн дөрөвдүгээрт эрэмбэтэй Хокүтофүжитэй барилдаж, өвдөг шорооджээ. Ингэснээр Тэрүнофүжи болон Митакэүми нар хоёулаа есөн даваа, нэг унаатайгаар башёг тэргүүлж эхлэв. Тэдний араас найман даваа, хоёр унаатай Такарафүжи, долоон даваа, гурван унаатай Тамаваши, Охо, Котоэко, Котоновака нар бичигдэж байна.

Озэки Такакэйшо бэртлийн улмаас башёг үргэлжлүүлэх боломжгүй болсон бол озэки Шодаи тааруу барилдаж байна. Тэрбээр өчигдөр сэкивакэ Таканошод ялагдсанаар дөрвөн даваа, зургаан унаатай болжээ. Хүчирхэг өрсөлдөгчөө буулган авсан Таканошо “Озэки цолтой том бөх буулган авсандаа баяртай байна. Тэр үргэлж ийм барилдаан үзүүлэхгүй байх” гэжээ.

Бусад монгол бөхчүүдийн тухайд, Кирибаяама Б.Лхагвасүрэн, Тамаваши Б.Мөнх-Оргил нар өрсөлдөгчөө дийлж, Хошорюү С.Бямбасүрэн, Ичиножо А.Ичинноров нар өвдөг шороодов.