Улсын Онцгой комисс, нийслэлийн Онцгой комиссын шуурхай штабын уялдааг хангах зорилгоор өнгөрсөн аравдугаар сард нэгтгэж удирдлагаар нь бригадын генерал Б.Ууганбаярыг томилсон. Иргэдийн хувьд хоёр жилийн өмнө гаргасан том алдаагаа давтахгүй нь гэх итгэл төрсөн нь нууц биш. Гэвч “сахил хүртээд шал дордов” гэгч нь  болов. 

Учир нь УОК-оос омикрон хувилбараас урьдчилан сэргийлэхийн тулд арванхоёрдугаар сарын 25-ны өдрөөс эхлэн гадаадаас ирж буй иргэдийг гурав хоног тусгаарлахаар болсон. Ингэхдээ 0-3 насны хүүхэд үнэ төлбөргүй, 4-12 насны хүүхэд 50 мянга, 13-аас дээш насны иргэд 100 мянган төгрөг байхаар тогтоосон.

Өнгөрсөн оны сүүлээс эхэлсэн энэ тусгаарлалт хоёр жилийн өмнөхөөс ялгарах зүйл огт байсангүй. Ямар ч зохион байгуулалтгүй. Хүний эрхийг хангах талаар бүр яриад ч хэрэггүй.  Халдвар хамгаалал сахиулах бус иргэдээс зөвхөн мөнгө л хурааж авдаг штаб боллоо. 

Ингээд зогсохгүй  УОК-ын шуурхай штаб цахим хуудаснаа  тусгаарлалтаас гарсан иргэдийн талархлын захиануудыг  нийтлэх болжээ.  “Ажлаа хийхгүй байна” гэсэн иргэдийн шүүмжлэлээс айсан уу, аль эсвэл иргэдээс оноо авахыг хүссэн үү. Ямартай ч дээрх талархлын захидал нь иргэдэд таалагдсангүй. Угтаа бол талархлын захидал  гэхээс илүүтэй иргэдээс ирсэн гомдлуудыг нийтлэхийг иргэд шаардаж эхэлжээ. Тэдний зүгээс “Бүхэл бүтэн УОК-ын шуурхай штаб талархлын захидал оруулдаг болчих гэж” гэж шүүмжилцгээж байна.

Дашрамд дурдахад, Шадар сайд С.Амарсайхан Эрүүл мэндийн сайд, ОБЕГ-ын дарга, УОК-ын нэгдсэн шуурхай штабын дарга нарт хандаж “Гадаадаас ирсэн иргэдийг тусгаарлалтын буудалд хүргэхээс өмнө та нар түрүүлж очоод ажилдаа сэтгэлтэй хандсан бол ийм асуудал гарахгүй байсан. Иргэдийг буруутгах шаардлагагүй. Насаараа төрд ажилласан хүмүүс яагаад ийм наад захын зохион байгуулалт хийж чадахгүй байгаа юм. Бүх зүйлд Ерөнхий сайд, Шадар сайд оролцох ёстой юм уу.  Чадахгүй бол ажлаа өгөөд чаддаг ажлаа хийгээд явцгаа. Та нар арай дэндэж байна” гэж байв.

Э.БУРАМ