Дэлхий дахинд Covid-19-ийн омикрон хувилбарын тархалт дахин тодорхойгүй нөхцөл байдал үүсгэв. Иймд гадаадын улс орнууд хилээ чангатгаж эхэлснээр олон улсын нислэгүүд ч хязгаарлагдаж эхэллээ. Тухайлбал, Япон улс гадаадын иргэдийг тодорхойгүй хугацаанд нэвтрүүлэхийг хориглоод байна. Мөн Өмнөд Солонгос зарим нислэгүүдээ цуцалсан. Тодруулбал, Сөүл-Улаанбаатар чиглэлд "МИАТ" ТӨХК-ийн энэ сарын 12, 15, 19, 22, 26, 29-ний өдрүүдэд буюу Лхагва, Бямба гаригийн нислэгүүд, мөн хоёрдугаар сарын 8, 15, 22-ны өдрүүдийн Мягмар гаригийн нислэгүүдийг цуцалжээ.

Иймд тус компани нислэгийн тийз худалдаж авсан зорчигчдыг хамгийн ойрын нислэгт шилжүүлэх, гарч буй зардлын зөрүүг хариуцаж, холбогдох зохицуулалтыг хийж байгаа аж. Мөн гадаадын улс орнуудаас тавьж буй шаардлагаас хамаарч тийз худалдан авсан зорчигчид зорчих боломжгүй болж буй тохиолдолд тийзний мөнгийг бүрэн буцаан олгож буй юм. Харин Сөүлийн чиглэлд нэгдүгээр сарын 9, 11, 14, 16, 18, 21, 23, 25, 28, 30-ны өдрүүдэд нислэг хэвийн үргэлжилнэ. Мөн хоёрдугаар сарын 5-наас эхлэн Лхагва, Баасан, Бямба, Ням гаригт нислэг үйлдэх юм.