Өмнөд Филиппинийн зүүн хэсэгт “Rai” хар салхи дэгдэж, аюулын ирмэгт тулжээ. Хар салхи одоогоор тус улсын төв болоод өмнөд хэсгийг дайраад байна.

Салхины хурд 215 км/цаг байгаа нь Саффир-Симпсоны хэмжүүрээр дөрөвдүгээр зэрэглэлтэй дүйцэх юм. Далайн зөөлөн уур амьсгал зонхилдог, салхины хүч харьцангуй сул тус бүс нутагт үүсээд буй хар шуурга сүүлийн 24 цагт улам ширүүсч, улмаар гамшгийн хэмжээнд хүрэх төлөвтэй байна.

Хар салхины аюулаас сэрэмжлүүлэх нэгдсэн төвөөс цаашдаа хурд нь 260 км/цаг хүрч болзошгүйг анхаарууллаа. Энэ нь Саффир-Симпсоны хэмжүүрээр тавдугаар зэрэглэл буюу супер хүчтэй хар салхи болно гэсэн үг.

Филиппинд хар салхийг Одетте гэж нэрлэдэг бөгөөд тус улсын Агаар мандал, геофизик, одон орон судлалын газраас хяналт тавьдаг. Хар салхины эргүүлгийн гадна байрлах бүс нутгуудаар бороошиж, нөхцөл байдал улам дордож магадгүй байна.

Пүрэв гаригийн өглөөнөөс эхлээд Баасан гаригийн өглөө хүртэл бороо үе үе ширүүсч, хүчтэй аадар орно гэж Агаар мандал, геофизик, одон орон судлалын газраас мэдээлжээ. Минданао, Висаяас орчимд борооны хэмжээ 250 мм хүрнэ гэв. Ийн хүчтэй аадар тасралтгүй орсноор үер усны аюул нүүрлэж, өндөрлөг газар нутгуудад хөрсний гулсалт үүсэхээр байна.

Агаар мандал, геофизик, одон орон судлалын газраас халуун орны хар салхины гуравдугаар зэргийн сэрэмжлүүлгийн дохиог зарлажээ.

Номхон далайн баруун хэсэгт арванхоёрдугаар сард хар салхи дэгдэх нь түгээмэл үзэгдэл биш боловч Филиппин улсын хувьд сүүлийн арван жилд үхлийн аюултай шуурга цөөнгүй тохиолдож байна.

Эх сурвалж: CNN