NASA-гийн сансрын хөлөг урьд өмнө судлагдаж байгаагүй корона нэртэй агаар мандлын бүс рүү нэвтэрснээр албан ёсоор наранд ойртож очлоо. NASA-гийн эрдэмтэд Мягмар гаригт АНУ-ын геофизикийн холбоотой уулзалт хийх үедээ энэ тухай мэдээлжээ.

Нар руу ниссэн анхны сансрын хөлөг болох "Parker solar probe" найм дахь удаагаа наранд ойртох үедээ буюу дөрөвдүгээр сард мөн корона бүсд нэвтэрч байсан. Тухайн үеийн нислэгийн мэдээллийг цуглуулах болон түүнийгээ баталгаажуулахад нэлээн хэдэн сар зарцуулжээ.

2018 онд ашиглалтад орсон "Parker solar probe" нь анхны нислэгээрээ нарны төв хэсгээс 13 сая км зайд ойртож очжээ. Тухайн үед сансрын хөлөг корона бүс рүү гурван ч удаа орж гарсан байна.

“Хамгийн анхны бөгөөд сэтгэл хөдөлгөм энэ аялал таван цаг үргэлжилсэн. Та бүхэнд таван цаг гэхээр тийм ч урт хугацаа гэж санагдахгүй байж магад. Гэхдээ "Parker solar probe" хөлөг тэр үед асар хол замыг асар богино хугацаанд туулсан юм. 100км/сек-ээс ч илүү хурдтай байсан” гэж Мичиганы их сургуулийн эрдэмтэн Жастин Каспер хэлжээ.

Корона бүс нь төсөөлж байснаас илүү тоосжилт ихтэй байсан гэж  Жонс Хопкинсын их сургуулийн эрдэмтэн Нур Рауафи ярив. Дараа дараагийн аяллуудаар эрдэмтэд корона бүс буюу нарны салхины талаар илүү ихийг олж мэдэх боломжтой. Нарны салхи гэдэг нь нарны дээд атмосфер дэх цэнэгжсэн эгэл биетүүдийн плазм тал бүр тийш хийсч гарсныг хэлнэ. Нарны салхинд гариг хоорондын соронзон орон агуулагддаг байна.

"Parker solar probe" ес дэх удаагийн оролдлогоо наймдугаар сард хийж байсан бөгөөд судалгааг дахин үргэлжлүүлэх шаардлагатай тул арваннэгдүгээр сард 10 дахь удаагаа наранд ойртжээ. 2025 онд сүүлийн тойрог замдаа гарахаас өмнө наранд улам ойртож, корона бүс рүү улам гүн нэвтрэхээр төлөвлөж байна.

Эх сурвалж: APNEWS