Монголын хөлбөмбөгийн үндэсний шигшээ багийн ахлах дасгалжуулагч Масэ Шүичи үүрэгт ажлаа хүлээлгэн өгчээ. Тэрбээр энэ оны дөрөвдүгээр сард томилогдож, цар тахлын хүнд цаг үед Катар-2022 дэлхийн аварга болон 2023 оны Азийн аваргын урьдчилсан шатны хэсгийн сүүлийн тоглолтод шигшээ багийг удирдан Киргизийг 1:0 гэсэн харьцаатай хожиж, мөн Азийн хөлбөмбөгийн холбооны 23 хүртэлх насны цомын урьдчилсан шатанд цахимаар бэлтгэл сургуулилт хийлгэн амжилттай оролцуулсан билээ.

Монголын хөлбөмбөгийн холбооны ерөнхийлөгч А.Ганбаатар, зөвлөлийн гишүүн С.Жаргалсайхан, ерөнхий нарийн бичгийн дарга Д.Тэрбаатар болон техникийн захирал Б.Буман-Учрал нар түүнийг хүлээн авч, уулзаж дурсгалын бэлгийг гардуулан баяр хүргэж, Монголын үндэсний шигшээ багийн төлөө, Монгол Улсын төлөө зүтгэсэнд талархал илэрхийлсэн юм.

Япон мэргэжилтэн Масэ Шүичи дасгалжуулагчийн хувьд эрүүл мэндийн шалтгааны улмаас тус ажлаа өгч байгаа билээ.Тэрбээр Монгол улсад цөөн хоногийн хугацаанд ирж, клубүүдийн дасгалжуулагч нарт сургалтын зохион байгуулж, мөн “Алтан бөмбөг 2021” ёслолын ажиллагаанд оролцсон юм.

Монголын хөлбөмбөгийн холбооны мэдэгдэлд "Хөлбөмбөгийн холбоо болон Монголын хөл бөмбөгт хайртай хэн бүхний нэрийн өмнөөс ахлах дасгалжуулагч Масэ Шүичидээ цаашдын ажил амьдралд амжилт, аз жаргалыг хүсье" гэжээ.