Дархан чиглэлийн зам дээр малын шир дэвссэн зураг олон нийтийн сүлжээнд цацагдав. Бод малын шир яагаад зам дээр дэлгэсэн талаар Мал эмнэлгийн ерөнхий газар болон Дарханы Эрүүл мэндийн газартай холбогдож мэргэжилтнүүдээс тодруулахад "Малын гоц халдварт өвчин ихэнх аймагт гарсны улмаас халдварын тархалтыг хумих, алдахгүй байх зорилгоор орон нутгийн зам дээр шир дэлгэсэн" гэв. Тухайлбал, Улаанбаатараас Дархан-Уул аймаг руу нэвтэрдэг хэсэгт үхрийн шир тавьсан. Үхрийн ширэнд ариутгалын бодис шингээсэн бөгөөд ингэснээр машины дугуйг хүний ажиллагаа шаардахгүйгээр ариутгаж байгаа гэдгийг холбогдох албаныхан тодотголоо.

Мал эмнэлгийн ерөнхий газраас асуухад аймгуудын гарах орох зам дээр үхрийн шир дэлгэсэн гэнэ. Цар тахал, халдварт өвчний тархалт өндөр байгаа үед хамгийн хямд бөгөөд оновчтой арга гэх хариултыг өгөв.

Өнгөрсөн зун цайны данх, шанага бариад замын нөхөөс хийж буй зам засварынхныг харсан  иргэд ийм арчаагүй улсад амьдарч байгаадаа гутарч, харамсч буйгаа илэрхийлж байв. Гэтэл саяхан хогны машины ард хоёр хүн суугаад зам дээр давс цацаж буй зураг олон нийтийн сүлжээнд цацагдаж мөн багагүй шүүмжлэл дагуудсан.  Харин энэ удаа олон жил хийж буй Дарханы зам дээр дэлгэсэн шир олны сонирхлыг ихэд татав.

Төсөвлөдөг, төлөвлөдөг атал бодит байдал дээрээ ажил хэрэгтээ мөнгөө зарцуулж чадахгүй жишиг Монголд тогтоод удаж буй. Шүлхийтэй тэмцэхээр хэдэн арван сая төгрөгийн санхүүжилтийг яам гаргасан ч халдвараас урьдчилан сэргийлэх энэ аргаа хямд бөгөөд оновчтой шийдэл гэж өөрсдийгөө хаацайлж суугаа нь харамсалтай. Малын гоц халдварт өвчнөөс сэргийлэх хэр оновчтой шийдэл бол.

Элдэв янзын хөшөө барьж, төсвийн мөнгийг үрж байгаа дарга нар энэ байдлаасаа иргэдээсээ биш гэхдээ дэлхийгээс ядаж ичдэггүй юм байх даа. Тэд Монгол Улсын "том дарга" гээд гадаадад гайхуулаад явдаг биш бил үү.