Францын Мон Блан ууланд хэдэн арван жилийн турш булаатай байсан маргад, бадмаараг, индранил эрдэнийн чулууг олсон уулчин хайрцагтай эрдэнэсийнхээ талыг нь хүлээлгэж өгчээ. Нэр нь тодорхойгүй уулчин эдгээр үнэт чулууг анх 2013 онд олсон аж.

Тэдгээр эрдэнэсийг хагас зуун жилийн өмнө Мон Блан уулнаа осолдсон Энэтхэгийн онгоцны аль нэг зорчигчийнх болов уу гэж таамаглаж байгаа юм.

Уулчин Францын хуулийн дагуу уг олзоо цагдаагийн газарт хүлээлгэн өгснөөр зуу зуун эрдэнэсийн чулууныхаа тэн хагасаар шагнуулжээ. Чулууны эзнийг Энэтхэг улсаас олох оролдлого бүтэлгүйтсэн учраас үлдсэн талыг нь Шамони хотын захиргаа хүлээж авсан байна.

Үнэт чулууг ойролцоогоор 150 мянган еврогийн үнэтэй хоёр тэнцүү багц болгон хуваасан гэж Шамони хотын дарга Эрик Фурниер хэлжээ. Тэрбээр олсон эрдэнэсээ цагдаад хүлээлгэн өгсөн уулчинг шударга зангийнх нь төлөө сайшаан магтсан байна.

Мон Блан ууланд Энэтхэгийн хоёр ч онгоц осолдож байсан ба эхнийх нь 1950 онд 48 зорчигч нас барсан осол байв. Дараа нь 1966 онд болсон ослоор 117 зорчигч нас баржээ.

Албаныхан уг үнэт эрдэнэсийг 1966 онд Мумбай–Нью-Йорк чиглэлд аялаж байгаад осолдсон онгоцноос гээгдсэн болов уу гэж таамаглаж байна. Тухайн үед уулнаас цогцос болон ачаа тээшнүүд олдож байжээ. Жишээлбэл, 1966 оны огноотой сонин, хуанли, хувь хүний захидал 2012 онд олдож байсан бөгөөд тус ослоор амиа алдагсдын дунд Энэтхэгийн нэртэй цөмийн физикч Хоми Ж Бхабха байсан юм.

Эх сурвалж: BBC

М.Наранжаргал