Турк улс даяар энэ долоо хоногийн эхээр хүчтэй шуурга шуурснаас нас барсан хүний тоо зургаа болж, 52 хүн гэмтэж бэртсэнийг мэдээлжээ. Хохирогчдын дөрөв нь Истамбул хотод бүртгэгдсэн ба гурван хүний бие хүнд байна. 16 сая хүнтэй Истамбул хотод шуурганы үеэр сүмүүдийн орой, дээвэр хийсч, модод үндсээрээ булгарч, алдартай цагны цамхаг сүйдсэн аж. Түүнчлэн хүчтэй шуурганы улмаас далайн өндөр давлагаа үүсч, эргийн газруудыг усанд автуулжээ.

Туркийн цаг уурын албанаас мэдээлснээр шуурганы үеэр салхины хурд цагт 130 км болж нэмэгдсэн нь тус улсад өмнө нь бүртгэгдээгүй хүчтэй шуурга болжээ. Туркийн баруун өмнөд хэсгээр хүчтэй шуурга болох нь түгээмэл бөгөөд ийм хэмжээний хохирол учруулах нь бага байв.