Германы Мюнхен хотод төмөр замын байгууламжийн талбайд дэлхийн хоёрдугаар дайны үеийн тэсрэх бөмбөг дэлбэрч дөрвөн хүн шархатсан хэрэг гарчээ. Үүнээс нэг хүн нь хүнд гэмтсэн байна.

Гал сөнөөгчдийн хэлж буйгаар төв галт тэрэгний буудлын ойролцоо байрлах Доннерсбергер гүүрний дэргэд өрөмдлөгийн ажил хийж байх үеэр уг дэлбэрэлт болжээ. Дэлбэрэлтийн улмаас Мюнхений ихэнх хэсэгт галт тэрэгний хөдөлгөөн зогсонги байдалд орсон байна.

Германаас үе үе дэлхийн хоёрдугаар дайны үеийн дэлбэрч амжаагүй тэсрэх бөмбөг олддог бөгөөд тухай бүрт нь яаралтай нүүлгэн шилжүүлж, мэргэжилтнүүд тэсрэх бөмбөгийг аюулгүй болгодог байна.

Цагдаагийнхны мэдэгдэж буйгаар, гүүрний ойролцоо хонгилд ажил явагдаж байх үед тэсрэх бөмбөг дэлбэрсэн гэв. Эхлээд тэнгэр баганадсан утаа гарч, араас нь дэлбэрэх чимээ дуулдсан аж. Дэлбэрэлтийн хүчинд газар ухагч экскаватор хүртэл хөмөрсөн байна.

Түргэн тусламж болон бөмбөг салгагч мэргэжилтнүүд хэргийн газарт яаралтай ирсэн ба өөр тэсрэх бөмбөг байгаа эсэхийг шалгаж байна. Уг хэргийн улмаас төв буудал руу ирэх, очих галт тэрэгний хөдөлгөөнийг хязгаарлаад байгаа авч зарим холын шугам хэвийн үйлчилгээгээ үзүүлээд эхэлсэн байна.

Баварийн дотоод хэргийн сайд Йоахим Херманн уг тэсрэх бөмбөгийг 250 кг жинтэй байсан гэв. Мөн тэрбээр Германы хэвлэл мэдээлэлд өгсөн ярилцлагадаа “Урьд нь яагаад хэн ч энэ бөмбөгийг олж илрүүлээгүй байв гэдгийг шалгах шаардлагатай” гэжээ.

Тэсрэх бөмбөгийг ихэвчлэн Их Британи болон америкчуудын хаясан байдаг. Дэлхийн хоёрдугаар дайны үеийн тэсрэх бөмбөг олдсонтой холбоотойгоор хотыг нүүлгэн шилжүүлэх эсэх нь одоогоор тодорхой болоогүй байна. Мюнхены төв хэсэгт явагдаж буй бүтээн байгуулалтын ажлуудын хүрээнд дайны үеийн зэр зэвсгийн үлдэгдэлийг сайтар шалгах хэрэгтэй болж байна.

Өмнө нь 2017 онд Франкфуртад 1.4 тонн жинтэй Их Британийн тэсрэх бөмбөг олдох үед 70 мянган хүнийг нүүлгэн шилжүүлж байсан.

ЭХ СУРВАЛЖ: BBC