Гадаад улсад амьдарч буй болон дотоодын иргэдийн интернэт банкинд АНУ-аас удаа дараа хууль бусаар халдаж, их хэмжээний хохирол учруулсан хэрэгт яллагдагчаар татагдсан “О” гэгчийг ЦЕГ-ын Эрүүгийн цагдаагийн албанаас Интерполын шугамаар олон улсад эрэн сурвалжилж байжээ. Улмаар  түүнийг АНУ-ын хууль сахиулах байгууллагаас хүлээн авч, цагдан хорих таслан сэргийлэх арга хэмжээ авсан байна.

Уг этгээд нь 2018 онд АНУ-д очсон бөгөөд 2019 оноос эхлэн иргэдийн интернэт банк руу халдаж, бусдад их хэмжээний хохирол учруулсан гэмт хэрэгт шалгагдаж байсан юм. Тухайн этгээд гадаад улсад оршин сууж байсан тул Эрүүгийн цагдаагийн албанаас олон улсын хэмжээнд эрэн сурвалжлах ажлыг зохион байгуулж, үр дүнд нь өнөөдөр АНУ-аас Монгол Улсад албадан авч ирж байгаа юм. Албан бус мэдээллээр “О” 100 орчим удаагийн үйлдлээр иргэдэд нэг тэрбум орчим төгрөгийн хохирол учруулжээ.