Япон улс нь цар тахлын "омикрон" хувилбарын тархалт нэмэгдэж буйгаас сэрэмжлэн бизнес аялал, гадаадын сурагчид, дадлагажигчид зэрэг гадаадын иргэдийг хил нэвтрүүлэхгүй байхаар төлөвлөж буйгаа өнөөдөр (2021.11.29) зарлалаа. Гэхдээ хилийн хориг нь Японд буцан ирж буй  гадаадын оршин суугчид болон тус улсын иргэдэд хамаарахгүй аж. Гадаадын иргэдийг хүлээж авахгүй байх шийдвэрийг өнөөдөр үдэд Японы ерөнхий сайд Фүмио Кишида танилцуулах гэнэ.

Япон нь жил орчмын хугацаанд хилээ хаасны эцэст арваннэгдүгээр сарын 8-наас эхлэн гадаадын оюутнууд, техникийн дадлагажигчдийг хүлээн авч эхэлсэн юм. Ингэхдээ тэднийг хил нэвтрэхээс 10 хоногийн өмнө вакцинд хамрагдах, ирснийхээ дараа 14 хоногийн хугацаанд тусгаарлагдах зэрэг журмыг танилцуулсан.

Гэвч гүйцэт судлагдаагүй "омикрон" хувилбарын халдвараас шалтгаалан ийнхүү дахин хилээ хаахад хүрчээ. Энэ мэдээлэл нь гадаадын оюутан сурагчдад тун таагүй мэдээлэл төдийгүй, тус улсад очихоор олон тооны баримт бичиг цуглуулсан гадаадын иргэдэд хүндрэл үүсгэж байна.

ЭХ СУРВАЛЖ: JAPAN TIMES