Улаанбаатар хотын захирагч Д.Сумъяабазар ирэх оноос бизнесийн орчныг чөлөөтэй болгох тухай өмнө нь мэдэгдсэн. Энэ хүрээнд аж ахуйн нэгжүүдэд дарамт болдог шаардлагагүй дүрэм, стандартыг хүчингүй болгох, цахимаар зөвшөөрөл олгох зэрэг цаг үеийн асуудлаар өнөөдөр /2021.11.29/ мэдээлэл хийлээ.

Нийслэлийн Засаг дарга Д.Сумъяабазар:

-Улаанбаатар хотын мэдээллийн урсгалыг нэг болгох, нийслэлийнхэнд зөв мэдээллийг өгөх боломжийг нээж байна. Бүх зүйл нээлттэй байх ёстой. Хотын ажил бол амаргүй ажил. Тэр дундаа эрхзүйтэй уялдсан төсөв санхүүгийн асуудал, 30 жилийн гажуудлыг богино хугацаанд засч залруулахаар ажиллаж байна. Нийслэлд үйл ажиллагаа явуулж буй аж ахуйн нэгжүүдэд төрийн захиргааны байгууллагуудын хүнд суртал нэрмээс болдог. Үүнийг өөрчлөх чиглэлээр бид ажиллаж байна.

Ялангуяа цар тахлын эсрэг нийслэлчүүд гуравдугаар тунд хамрагдаж, халдвар авсан тохиолдолд хүндрэлгүй давж гарахыг уриалж байна. Хүнд суртал гаргасан, иргэдийг чирэгдүүлсэн төрийн захиргааны алба хаагчдад захиргааны арга хэмжээ авч байна.

Арванхоёрдугаар сарын 15-нд шар бүс рүү орно. Аж ахуйн нэгжүүдэд ажиллах таатай орчныг бүрдүүлж, төрийн дарамтаас ангижруулах, хүнд суртлыг арилгах, хувийн хэвшлийнхнийг дэмжих бодлогоор ажиллана.

Мөн нийтийн эдэлбэр газраас сөөм газрыг ч алдахгүй гэдгийг онцолъё

УЛААНБААТАРТ НЭМЖ ХОРООД БАЙГУУЛАХ ШААРДЛАГАТАЙ

Улаанбаатар хотод хэрэгжүүлж буй ажлуудын нэг нь нийтийн эдэлбэр газрыг чөлөөлөх.  Өмнө нь С.Амарсайхан даргын үед цуцалсан газруудыг эргүүлэн олгосон мэт ташаа мэдээлэл санаатай тарааж байна гэж ойлгосон. Залруулж хэлэхэд, цуцалсан газрыг дахин олгоогүй.

Ерөнхийлөгч У.Хүрэлсүхийн "Тэрбум мод" төсөлтэй уялдуулан нийслэлийн ногоон байгууламжийг нэмэгдүүлж, иргэдийн ая тухтай амьдрах орчныг бүрдүүлнэ. Энэ бол нийслэлийн удирдлага баг хамт олны эрхэм зорилго. Иймд шүүхийн шийдвэрүүд эхнээсээ гарч, бид ялаж байна. Биднийг хувьд  нийтийн газрыг нүдний цөцгий мэт хамгаалах үүрэгтэй. Тэгэхээр нийтийн эдэлбэр газар бол нийтийнх байх ёстой.

Үүнээс гадна нийслэлд нэмж хороод барих асуудал маргаан ч дагуулж байгаа. Төрийн бодлого шийдвэрийг хороод иргэддээ түргэн шуурхай хүргэх хэрэгтэй. Улаанбаатарт жилд  орон нутгаас 35 мянган хүн  ажил амьдралаа залгуулахаар ирж байна. Үүнээс болоод нийслэлд 15-30 мянга хүртэл хүн амтай 57 гаруй хороо байна. Хүн амын хэт их нягтаршлаас үүдэн зарим төрийн үйлчилгээ доголддог. Ийм гомдол ч иргэдээс тасардаггүй. Тиймээс бид нэг хороонд дунджаар 10-15 мянган иргэн байх зохицуулалт хийхээс өөр аргагүй.

Цаашид Улаанбаатар хот есөн дүүргээ хуваана. Үүнийг УИХ дээр ярих байх.  Жишээ нь, Сонгинохайрхан дүүрэг 340 мянга, Баянзүрх дүүрэг 400 мянга орчим хүн амтай. Эдгээр дүүргийг УИХ-аар хэлэлцүүлж, хувааж асуудлыг ярих байх.

Түгжрэлийг бууруулах тухай Ажлын хэсгийнхэн дараах мэдээллийг өглөө.

Өнөөдрийн байдлаар түгжрэлийг бууруулах ажил судалгаа, ТЭЗҮ, зөвлөх үйлчилгээ гэсэн үе шаттай үргэлжилж байна. 2020-2022 оноос томохон бүтээн байгуулалтын ажил эхэлнэ. Энэ хүрээнд түгжрэлийг бууруулах ажлыг эхлүүлэхээр болжээ. Энэ жилээс 1800 метр гүүрний ажлын бүтээн байгуулалт,  хөнгөн галт тэргийн суурь судалгаа, урьдчилсан ТЭЗҮ, зогсоол уулзвар, шинэчлэлт явган зам, дугуйн замын зураг төслийн ажлыг эхлүүлэхээр төлөвлөжээ. Мөн шугам сүлжээ, ногоон байгууламж, үерийн далан гэх мэт ажлын зураг төсөл нь нэгэн цогц арга хэмжээ болохыг холбогдох албаны хүн мэдээлэв.

Мөн сүүлийн үед олныг талцуулж буй Богд Зонховатай холбоотой асуудлаар Нийслэлийн ЗДТГ-аас  Тасганы овоо орчмын хэсэгчилсэн Ерөнхий төлөвлөгөө 2004 онд Бурхан багшийн дүр, цэцэрлэгт хүрээлэн байхаар тусгагдсан бол  бол 2007 онд Гандантэгчинлэн хийд орчимд Ерөнхий төлөвлөгөө батлагдсан. Эдгээр хоёр ерөнхий төлөвлөгөөг нэгтгэж “Түүх шашин соёлын цогцолбор”  буюу аялал жуулчлалын бүс болгохоор төлөвлөсөн байна. Засгийн газар, Соёлын яамны хүсэлтийн дагуу архитектур зураг төсөл нь батлагдсан бөгөөд барилгын ажлын зөвшөөрөл олгогдоогүй байсан гэж мэдээлэв.

Улаанбаатар хотын дарга Д.Сумъяабазар:

-Төсөл хөтөлбөрүүд нь нэг цогц арга хэмжээ бол хэрэгжинэ. Өндөр хүчдэлүүдийг зайлуулах ажлууд ч орно. Үндэсний цэцэрлэгт хүрээлэнгийн ойролцоох хоёр том өндөр хүчдэлийн шугамыг 11 метрийн дээгүүр  өндөрсгөнө. Үүний тулд судалгаа, зардал мөнгө заавал гарна. Зардал мөнгөгүй төсөл хөтөлбөр бүтэхгүй шүү дээ. Сошиалаар  бидний зөвлөгөөг  ав гэж хүнийг харлуулдаг гутаан доромжилдог болсон. Тэдэнд ямар судалгаа байдаг юм. Бид бол мэргэжлийн өндөр түвшинд бэлтгэгдсэн багтай судалгааг хийж олон нийтэд зөв мессеж өгч ажиллах ёстой. Иймд зарим шүүмжлэлээс айхгүй. Зоригтойгоор зарим ажлаа хийгээд л гарна. Бизнесийн байгууллага, аж ахуйн нэгжүүдэд тулгамдаж буй гол асуудал нь төрийн хүнд суртал  гэлээ.

Энэ үеэр сэтгүүлчийн асуултад дараах тайлбарыг өглөө.

–Нийслэлийн ажлыг улс төржүүлдэг гэлээ. Нууц биш бол нэрийг нь зарлаж болох уу?

-Ажил гацаад УИХ-ын гишүүн олон байгаа.

–Нэрийг нь зарлана уу?

-Заавал нэрийг нь хэлэх үү. Би зарламааргүй байна. Хоёрдугаарт, Улаанбаатар хотын Худалдан авах ажиллагааны газарт маш олон маргаан байна. Энэ асуудлаар тус газар луу холбогдоод мэдэж болно. Ер нь дугуйн замаас авхуулаад хот нийтийн аж ахуйтай холбогох бүх асуудалд маргаан гардаг. Аж ахуйн нэгжүүдийн хооронд их маргаан гардаг юм уу, аль эсвэл төсөвт өртгөө нэмэх шуналтай болсон эсэхийг нь мэдэхгүй. Тиймээс би улстөрчдийг нэр зааж хэлэхгүй. Хоёрдугаарт, улс төр дэндүү их оролцоотой байгаа нь үнэн гэлээ.

Бизнесийн байгууллагатай холбоотой төрийн хүнд  суртлын талаар Нийслэлийн Засаг даргын зөвлөх Д.Мөнх-Эрдэнэ хэлэхдээ “Улаанбаатар хотын даргын захирамжаар ажлын хэсэг байгуулсан. Үндэсний аюулгүй байдал, хүрээлэн байгаа орчин, хүний эрүүл мэндэд аюул учруулж болзошгүй онцгой нөхцөл, нарийн мэргэжил шаарддаг хуульд зааснаас бусад бүх төрлийн зөвшөөрөл. Үүнд  42 байгууллагын 600 орчим үйлчилгээнд судалгаа хийж байна. Иймд хуульд зааснаас бусдыг нь хүчингүй болгох. Хүнд суртал шат дамжлага бий болгож буй захиргааны хэм хэмжээг хүчингүй болгоно. Дээрх дурдсан 600 үйлчилгээ бол зөвхөн мөсөн уулын орой. Жишээ нь, худалдаа үйлчилгээ эрхэлж буй аж ахуйн нэгжүүд дөрвөн төрлийн байгууллагаас зөвшөөрөл авдаг. Иргэд зөвшөөрөл авахын тулд маш их бичиг баримт бүрдүүлдэг, 10-14 хоног алддаг. Захиргааны аливаа үндсэн үйл ажиллагаа хуульд үндэслэсэн байх ёстой. Зорилго хангасан үр нөлөөтэй байх ёстой. Энэ зарчмыг зөвшөөрөл олгож буй байгууллагууд хангаж байгаа эсэх нь эргэлзээтэй. Тиймээс иргэдтэй хамтран төрийн хүнд суртлыг үгүй болгоно” гэлээ.