“Соёлын бүтээлч сар” аяны хүрээнд олон улсын “Young Spikes Integrated Competition" тэмцээнийг Монголын маркетингийн холбоотой хамтран зохион байгуулжээ. “Spikes Asia” наадам нь Ази Номхон Далайн бүсийн бүтээлч үйлдвэрлэлийн салбарын тэргүүлэх наадам бөгөөд дэлхийн шилдэг маркетингийн агентлаг, брэнд, компаниудын маркетингийн албаны дарга нар, медиа компаниуд, стартапууд зэрэг бүтээлч үйлдвэрлэлийн салбарынхан хуран чуулж, туршлага солилцож, салбарын хамгийн нөлөө бүхий хүмүүсийн сургалт семинарт хамрагдаж, тухайн оны шилдэг маркетингийн ажлуудыг шалгаруулдаг билээ.

Энэхүү наадмын нэг хэсэг болох 30 хүртэлх насны залуус маркетеруудын дунд зохион байгуулагддаг "Young Spikes Competition" тэмцээн нь Integrated, Media, Digital, PR, Design гэсэн 5 төрлөөр явагддаг бөгөөд Монголын маркетингийн холбооноос хоёр дахь удаагаа энэхүү тэмцээнийг амжилттай зохион байгууллаа.

Тэмцээнд оролцох багууд 30 цагийн турш өгөгдсөн даалгаврын дагуу маркетингийн кампанит ажлын цогц төлөвлөлтийг хийж гүйцэтгэдэг. Үүндээ креатив санаа, стратеги төлөвлөлт, медиа сувгийн төлөвлөлт, хэрэгжүүлэх үйл ажиллагааны календарьчилсан төлөвлөгөө зэргийг тусгаж өгдөг. Хамгийн креатив санааг гарган гайхалтай төлөвлөгөөг боловсруулсан нэг баг Монгол Улсаа төлөөлөн 2022 оны  оны хоёрдугаар сард болох Азийн тэмцээнд өрсөлдөх юм.