Ньюс агентлаг энэ долоо хоногийн онцлох сурвалжлагуудаа тоймлон хүргэж байна.

ЗАЛУУС МОНГОЛООС ДҮРВЭХИЙГ ХҮСЧ БАЙНА

Цар тахлын улмаас сүүлийн хоёр жил  гадаадад  ажиллах хүч илгээх нь завсардсан. Тэгвэл сүүлийн саруудад эргээд эрчимжиж эхэлжээ. Монголд хойд хормойгоо авч, урд хормойгоо нөхөж амьдарсаар залхсан залуусын хувьд ганц гарц нь гадаадад амьдрах. Ялангуяа Солонгос, Япон руу ажиллах хүсэлтэй залуусын тоо эрс нэмэгджээ.

“Ажлаад л байдаг ажлаад л байдаг. Цалин гэж өчүүхэн юм авна. Түүгээрээ дараагийн цалин буутал амь залгуулаад  дуусна. Хурааж хуримтлуулах, аялж зугаалах, амьдралаас таашаал авах боломж  Монголд алга. Тиймээс дэлхийн өндөр хөгжилтэй, ядаж хүний хөдөлмөрийг шударгаар үнэлдэг улсад очиж ажиллаж амьдармаар байна. Элгэн садан, ээж аавтайгаа эх орондоо үлдмээр байвч үр хүүхдээ сайхан амьдруулж, соёлтой боловсролтой хүн болгохын тулд гадагшаа явахаар шийдсэн” гэж Япон хэл сургалт, хөдөлмөр зуучлалын төвд  суралцдаг  25 настай  бүсгүй  эрс шийдэмгий хэлэв.

Энэ зуур 20 настай нэг ангийн гурван залуутай хэсэг ярилцлаа.  Тэд Япон хэл сураад “амиа” аваад явах чадвартай болсон даруйдаа эндээс явах зорилготой гэнэ.

Үргэлжлэлийг энд дарж уншина уу.

ӨРХИЙН ЭМНЭЛГИЙН АЧААЛАЛ 50 ХУВЬ БУУРЧЭЭ

Эерэг гарчихлаа, эмч ээ ирж үзээрэй гэдэг тохиолдол буурч, өрхийн эмнэлгийн ачаалал өнгөрсөн долоо хоногоос багасч эхэлсэн байна. Сүүлийн нэг жилийн хугацаанд өрхийн эрүүл мэндийн төвийн тусламж үйлчилгээний хүртээмжийн асуудал хүндэрч, эмч олдохгүй байна гэж бухимдах иргэдийн гомдол тасраагүй.

Харин одоо хэсэгхэн хугацаанд ч болов цар тахлын ачаалал буурч, үндсэн үйлчилгээгээ хэвийн явуулах боломжтой болжээ. Гэсэн ч эерэг гарсан тестээ барьж ирж, эмчийг бухимдуулдаг хэвээрээ аж.

Тест оношлуур, товлолт вакцин, түргэвчилсэн шинжилгээ гэж түм түжигнэж, иргэдийн маргаан тасардаггүй эмнэлгүүд өнөөдөр нам гүм болжээ. Covid-19-ийн өвчлөлийн батлагдах тохиолдол багасч, томоохон эмнэлгүүд орны нөөцөө багасгаснаар эмнэлгийн ачаалал сая нэг буурсан гэх мэдээ гарав.

Үргэлжлэлийг энд дарж уншина уу.

ШУУДАЙНЫ ХОМСДОЛ ТҮЛЭЭНИЙ ҮНЭД НӨЛӨӨЛЖЭЭ

Түлээ, нүүрсээр өвлийг өнтэй давдаг иргэдийн хувьд санаа зовох асуудлууд бишгүй. Гэр хорооллын иргэд энэ жил шахмал түлшээ 50 хувийн хөнгөлөлттэй үнээр худалдан авч буй. Гэтэл шуудай түлээ сайшруулсан түлшнээс хоёр дахин үнэтэй байна.

Улаанбаатар хотын модны томоохон захын нэг "Цайз"-ыг зорих замд байрлах сайжруулсан шахмал түлш, түлээний мод борлуулдаг цэгээр орлоо. Үүдэнд нь давхарлан өрсөн түлээнээс харахад л иргэдийн худалдан авалт энэ жил муудсан нь илт. Худалдагчийн хэлснээр модны үнэ нэг хэсэг өсч, одоо эргээд бууж байгаа гэв. Тэрбээр ярихдаа “Бид захаас авсан бөөний үнэ дээрээ 100-200 төгрөг  нэмж зарж байгаа” гэлээ.

Түлээний мод жижиглэн, бөөний худалдаанаасаа хамааран шуудай нь 5000-7500 төгрөгийн хооронд зарагдаж байна.

Үргэлжлэлийг энд дарж уншина уу.

Цар тахал хоёр жил үргэлжилж бизнесийн салбар, хувийн хэвшлийнхэн амаргүй цаг үеийг туулж байна. Эдийн засаг элгээрээ хэвтэж, хувийн хэвшлийнхэн “хумигдсан” энэ цаг үед ажлын байраа хадгалж үлдсэн үндэсний үйлдвэрлэгч компаниудыг бид цувралаар хүргэж байна.

Энэ удаад ажлын 1000 эмэгтэйг ажлын байраар хангах зорилго тавьсан  “Mongol made” брэндийг онцоллоо.  Тус брэндийн үүсгэн байгуулагч, Б.Солонго, Б.Пунсалмаа нар савангийн зах зээлд хүчээ сорихоор зориг шулууджээ. Үйлдвэрлэл, тэр дундаа 95 хувь нь импортоос хамаардаг салбарт хүчээ үзнэ гэдэг хүндхэн даваа. Тэд гурван жилийн хугацаанд дотоодын савангийн зах зээлийн 50 хувийг эзлэх том зорилго өмнөө тавьжээ.

Тус брэнд нь 2021 оны гуравдугаар сараас эхэлсэн бөгөөд өнөөдрийн байдлаар 10 гаруй төрлийн бүтээгдэхүүнийг зах зээлд нийлүүлж байна. Удахгүй шампунь, бие арчилгаа зэрэг 20 гаруй бүтээгдэхүүн худалдаанд гаргахаа дуулгав.

Үргэлжлэлийг энд дарж уншина уу.