Биржийн шимтгэлийн орлогоосоо 50 хувийг койн эзэмшигч нарт ногдол ашиг болгон олгоно

-Санал болгож байгаа 7 тэрбумын 3 тэрбумыг нь стратегийн хөрөнгө оруулагч нарт, үлдсэн 4 тэрбумыг олон нийтэд санал болгож байна-

Крипто валют, блокчэйн технологид суурилсан “Зоос Дижитал Эксчэйнж" биржийн захирал М.Эрхэмбаатараас Зоос койны талаар тодрууллаа. Зоос койны арилжааны захиалга 2021 оны 11 дүгээр сарын 20-нд эхэлсэн бөгөөд өнөөдөр 22-ны 22.00 цагт хаагдах юм.

-Сайн байна уу, юуны өмнө та өөрийгөө манай уншигчдад танилцуулна уу, яагаад заавал виртуал хөрөнгийн биржийн үйлчилгээг гаргах болов?

-Сайн байна уу, “Зоос Дижитал Эксчэйнж” бирж нь 2018 оны 12 дугаар сард байгуулагдсан, блокчэйн технологи дээр суурилсан бүтээгдэхүүн үйлчилгээг гаргадаг “Андууд Лав” ХХК-ийн тусдаа менежменттэй охин компани юм. “Андууд лаб” компани нь цэвэр технологийн компани бөгөөд өмнө нь on-air.mn, chatbot.mn, www.gafety.mn зэрэг үйлчилгээг хөгжүүлж ирсэн түүхтэй. Энэ удаад ч блокчэйн технологи дээр суурилсан Зоос Дижитал Виртуал хөрөнгийн биржийн системийг 100 хувь дотооддоо хөгжүүллээ.

-Сүүлийн үед крипто биржүүд нэлээд их шинээр гарч ирж байна. Танай бирж бусад биржүүдээс юугаараа давуу талтай вэ?

-Хэд хэдэн онцлог, давуу талууд бий. Бид МТ-ийн салбарт сүүлийн 20 жил ажилласан туршлагатай, олон мянган хандалтыг даах, системийн архитектур, хууль хяналтын шаардлагад нийцүүлэн програмчлах хөгжүүлэлтийн баг хамт олонтой. Үүнээс гадна хувьцааны зах зээлд 20 жил ажилласан “Бумбат Алтай” ҮЦК-тэй хамтарч уламжлалт хөрөнгийн захын салбарыг өөрчлөхөөр ажиллаж байна. Мөн виртуал хөрөнгийн дараа дараагийн шинэ бүтээгдэхүүн үйлчилгээнүүдийг нэвтрүүлэхээр төлөвлөөд байна.

-Нууц биш бол ямар бүтээгдэхүүн үйлчилгээнүүдийг нэвтрүүлэхээр төлөвлөж байна вэ?

-Одоогоор Монгол Улсад 400 мянга гаруй хүн ямар нэгэн байдлаар виртуал хөрөнгө эзэмшиж байна. Эдгээр виртуал хөрөнгүүдийг зах зээлд нийлүүлэх, эргэлтэд оруулах, арилжаалах хэрэгцээ шаардлага өдөр бүр л нэмэгдсээр байна. Тиймээс бирж нь виртуал хөрөнгийг барьцаалсан зээл олгох, кредит картжуулах, хадгаламж үүсгэх, арилжаалах боломжийг олгоно. Мөн BTC, ETH, BNB, XRP, DOGE, DOT, ADA, SOL, MANA, LUNA, QUEST зэрэг хослолууд удахгүй манай бирж дээр арилжаанд орж эхэлнэ.

-Зээлийн үйлчилгээ гэдэг сонирхолтой санагдлаа. Тэр талаараа тайлбарлахгүй юу?

-Манай бирж дээр арилжаалагдаж байгаа виртуал хөрөнгийг зах зээлийн үнэлгээний 60 хүртэлх хувьтай дүйцэхүйц хэмжээний зээлийг 1 хүртэл сарын хугацаатай олгох юм. Ингэснээрээ удаан хугацаанд хадгалахаар шийдсэн койныг үнэ өсөж зарахыг хүлээхгүйгээр мөнгөө дахин эргэлтэд оруулах боломжийг хэрэглэгчдээ өгч байгаа том давуу тал юм.

-Зоос койны хэдэн хувийг олон нийтэд санал болгож байгаа вэ? Зоос койныг авсан хэрэглэгчдэд ямар давуу тал үүсэх вэ?

-Биржийнхээ үйл ажиллагааг сайжруулах, зээл олголтод хөрөнгө босгох зорилготой Зоос койныг гаргасан. Санал болгож байгаа 7 тэрбумын 3 тэрбумыг нь стратегийн хөрөнгө оруулагч нарт, үлдсэн 4 тэрбумыг олон нийтэд санал болгож байна. Мөн биржийн шимтгэлийн орлогоосоо 50 хувийг койн эзэмшигч нарт ногдол ашиг болгон олгоно.

-Урьдчилсан захиалгаар цуглуулсан хөрөнгө оруулалтаа юунд зарцуулах вэ?

-Хөрөнгө оруулалтын 20 хувийг системийнхээ сайжруулалт хөгжүүлэлтэд, харин үлдсэн 80 хувийг койн барьцаалсан зээлийн эх үүсвэр болгон ашиглана. Мөн биржийн орлого нь шимтгэлийн орлого, зээлийн шимтгэлийн орлого, гүйлгээний зарлага, арилжааны шимтгэлээс орлогын эх үүсвэрүүдийг бүрдэж байна.

-Хоёрдогч зах зээлийн арилжаа хэзээ эхлэх вэ?

-Хоёрдогч арилжаа 12 дугаар сарын 10-нд эхэлнэ. Олон нийтэд санал болгож дүн өндөр биш бодит байгаа учраас хоёрдогч арилжаанаас өснө гэж таамаглаж байна.

Баярлалаа. Танай хамт олонд ажлын амжилт хүсье!