Засгийн газрын өчигдөр (2021.11.17)-ийн хуралдаанаар Улаанбаатар хотын Ерөнхий менежер Т.Гантөмөрийг үүрэгт ажлаас нь чөлөөлж, түүний оронд УИХ-ын гишүүн асан Д.Ганболдыг томилжээ. УИХ-ын гишүүнээр ажиллаж байсан тэрбээр өнөөдрөөс үүрэгт ажилдаа орж байгаа аж.

Хотын Ерөнхий менежер асан Т.Гантөмөр тэтгэвэртээ гарч буй тул ийн томилгоо хийгдсэн байна. Д.Ганболдын тухайд 2016-2020 оны парламентад ажилласан, Улаанбаатар хотын Налайх районы Ардын хурлын гүйцэтгэх захиргаанаас ажлын гараагаа эхэлсэн. Түүнээс хойш тасралтгүй төрийн албанд зүтгэсээр УИХ-ын гишүүнээр сонгогдон ажиллаж байв. Эдийн засагч, эрх зүйч мэргэжилтэй ч санхүүгийн салбарт олон жил ажиллажээ.

АЖИЛЛАСАН БАЙДАЛ

• 1987-1988 онд Улаанбаатар хотын Налайх районы АДХГЗ-ны Санхүүгийн хэлтэст зааварлагч, нягтлан бодогч
• 1988-1989 онд Дорнод аймгийн Хилийн цэргийн дугаар ангид хилчин байлдагч
• 1989-1990 онд Улаанбаатар хотын Сүхбаатарын районы АДХГЗ-ны санхүүгийн хэлтэст ерөнхий нягтлан бодогч
• 1990-1992 онд Улаанбаатар хотын АДХГЗ-ны санхүүгийн хэлтэст татвар болон санхүүгийн хяналт шалгалтын улсын байцаагч
• 1992-2000 онд Улаанбаатар хотын Чингэлтэй дүүргийн Засаг даргын Тамгын газарт Санхүүгийн хэлтсийн дарга
• 2000-2008 онд Нийслэлийн Засаг даргын Тамгын газрын санхүү, төрийн сангийн хэлтсийн дарга
• 2008-2016 онд Чингэлтэй дүүргийн Засаг дарга
• 2016 оноос Монгол Улсын Их Хурлын гишүүн