Хятадад жил бүрийн арваннэгдүгээр сарын 11-нд “Ганц бие хүмүүсийн өдөр ба ганцаардсан зүрх сэтгэлийн өдөр”-ийг тэмдэглэдэг бөгөөд энэ өдөр онлайн дэлгүүрүүд хэрэглэгчдэдээ томоохон хямдрал зарладаг. Уламжлал ёсоор өчигдөр ганц бие хүмүүст зориулсан өдөрлөгөөр хятадууд 139.1 тэрбум ам.долларын худалдан авалт хийжээ. Энэ нь цар тахлын үед эдийн засгийн эргэлт удааширсан ч түрүү жилийн худалдан авалтын орлогыг давсан байна.

Тухайлбал, "Алибаба" арваннэгдүгээр сарын 1-нээс 11-ний хооронд зохиогдсон урамшуулалт худалдааны өдрүүдэд 540.3 тэрбум юань буюу 84.5 тэрбум доллар гүйлгээ хийсэн тухай Пүрэв гаригт мэдэгджээ. Энэ нь өнгөрсөн жилийн 14% өсөлттэй харьцуулахад бараг 93%-иар өссөн үзүүлэлт гэв. Эдгээр өдрүүдэд жилийн хамгийн том онлайн маркетинг худалдааны арга хэмжээнүүд зохиогдож, эртнээс бэлдсэн сурталчилгаа, хямдрал, брэнд  хөнгөлөлт, тусгай нөхцлүүдээр хэрэглэгчдийг татдаг.

Үүнд "Алибаба" корпораци өндөр ач холбогдол өгч, сүүлийн 10 гаруй жил амжилттай хэрэгжүүлжээ. Энэ оны эхээр Хятадын албаныхан монополчлолын эсрэг дүрэм зөрчсөнд "Алибаба" корпорацийг буруутгаж, 2.8 тэрбум ам.долларын торгууль ногдуулсан.

Түүнчлэн хэрэглэгчдийн гар утсанд сурталчилгааны мэдээлэл хэт их тараасан гэж өнгөрсөн долоо хоногт "Алибаба" болон "Мэйтуантай" холбоотой цахим худалдааны платформын 16 операторыг Гуандун мужийн албаныхан саатуулж, "шударга бус өрсөлдөөн"-ий тухай хууль, дүрмийг зөрчсөн тухай анхааруулж сануулга өгсөн байна.

Эх сурвалж: YAHOO NEWS
А.ГАНТУЛГА