Өчигдөр Хан-Уул дүүргийн гуравдугаар хороо, Яармагт Сонсголонгийн гүүрээс зүүн тийш 700-800 метрийн орчмоос иргэн 23 настай, эрэгтэй М нь усанд боогдсон талаар Нийслэлийн Онцгой байдлын газарт мэдээлэл иржээ. Мэдээллийн дагуу Аврах отрядын бүлэг очиж ,  голын уснаас гаргасан байна. Энэ сард нийт нутгаар хур бороотой байгаатай холбогдуулан ард, иргэдийг үер усны аюулаас болгоомжлохыг сануулсаар байгаа ч иргэд өөрсдийн хэнэггүй, хайнга байдлаасаа болж голын усанд боогдох, улмаар амь насаа алдах тохиолдол энэ мэтчилэн гарсаар байна.  
Мэргэжлийн байгууллагуудаас хүн хүч, техник хэрэгслээ дайчлан урьдчилан сэргийлэх арга хэмжээг сайн зохион байгуулж байгаа ч ийнхүү санамсар болгоомжгүйгээс болж үер, усны аюулд өртөж байна. Даваа гаригт Сонсголонгийн гүүрнээс зүүн тийш 700-800 метрийн орчимд 11 настай жаалхүү харамсалтайгаар усанд осолдож амь насаа алдсан. Гэтэл уг явдлаас нэг өдрийн дараа  тус газарт хүн усанд боогдсон дуудлага ирүүлсэн нь энэ юм.  Азаар иргэн М-ийг эсэн мэнд аварлаа.  Дээрх явдалтай холбогдуулан  Нийслэлийн Онцгой байдлын газраас ард иргэддээ хандан гол мөрний усны түвшин нэмэгдсэн, хур бороотой үед голын усанд орохгүй байж, үерлэсэн гол орчмоор явахгүй байж үер, усны аюулаас сэрэмжлэхийг анхааруулж байна.

П.Наран