"ISU" буюу Олон улсын тэшүүрийн холбооны 2021-2022 оны уран гулгалтын Гранд Пригийн хоёр дахь тэмцээн Канад улсын Ванкувер хотноо болж өчигдөр/2021.10.31/ өндөрлөлөө. 11 орны 60 тамирчин энэ удаагийн тэмцээнд өрсөлдсөн бөгөөд эрэгтэй ганцаарчилсан төрөлд Америкийн тамирчид, эмэгтэй ганцаарчилсан төрөлд Оросын тамирчид үнэмлэхүй ялалт байгуулав.

Эрэгтэй ганцаарчилсан төрөл:

1. Натан Чэн/АНУ/ – 307.18
2. Жэйсон Браун/АНУ/ – 259.55
3. Евгений Семененко/ОХУ/ – 256.01

Эмэгтэй ганцаарчилсан төрөл:

1. Камила Валиева/ОХУ/ – 265.08
2. Елизавета Туктамышева/ОХУ/ – 232.88
3. Алена Косторная/ОХУ/ – 214.54

Насанд хүрэгчдийн ангилалд анхны тэмцээндээ оролцсон өдгөө 15 настай Камила Валиева эгч нарыгаа ялж, алтан медалийн тавцанд зогслоо. Ингэхдээ бүр дэлхийн рекордыг эвдэж, нийт 265.08 оноо авав. Ирэх 2022 оны Бээжингийн өвлийн олимпод Валиеваг алтан медаль авна гэж олон хүн таамаглаж байна.

Алдарт аваргуудын багш Этери Тутберидзегийн шавь Валиева түрүүлснийхээ дараа ярихдаа “Өнөөдөр баяртай байна. Бараг л даалгавраа биелүүллээ. Багахан л алдаа гаргалаа. Хөтөлбөрийнхөө дагуу бүх зүйлээ хийх гэж л хичээлээ. Мэдээж авсан оноондоо сэтгэл хангалуун байна. Дараагийн удаа илүү үзүүлбэр үзүүлнэ” гэжээ.

Хосын төрөл:

1. Суи Вэнжин – Хан Чон/Хятад/ – 224.05
2. Дарья Павлюченко – Денис Ходыкин/ОХУ/ – 193.08
3. Эшли Каин-Криббле – Тимоти ЛеДук/АНУ/ – 189.90

Мөсөн дээрх бүжиг:

1. Пипер Гиллес – Пол Пойрье/Канад/ – 210.97
2. Карлене Гуньард – Марко Фаббри/Итали/ – 200.05
3. Оливиа Смарт – Адриан Диаз/Испани/ – 192.93