Хүн төрөлхтөн дижитал буюу цахим эрин үед амьдарч байна. Технологийн дэвшлийн нөлөөтэйгөөр маш их хэмжээний мэдээлэл өгөгдөл (их өгөгдөл) богино хугацаанд бий болдог болсон. Улмаар их өгөгдлийг ашиглан, албан ёсны статистикийн бүтээгдэхүүн бий болгох, турших зорилготой ажлын хэсэг, олон улсын конференц, үйл ажиллагааг НҮБ-ын түвшинд 2013 оноос хойш тогтмол зохион байгуулж буй билээ.

Цаг үеийн шаардлагаар хэрэглэгчдээс илүү нарийвчлалтай, илүү богино хугацаанд илүү их тоон мэдээллийн хэрэглээ хурдацтайгаар өсөн нэмэгдэж, үүний нөлөөгөөр статистикийн байгууллага дараахь сорилтуудтай тулгарч буй юм. Үүнд:

• Төсвийн хэмжээ багасах
• Мэдээлэгчид ирэх дарамт нэмэгдэх
• Хариултын түвшин буурах зэрэг сорилтууд багтаж байна.

Дээрх асуудлыг шийдвэрлэх боломжтой гарц нь их өгөгдөл гэж үзэж буй бөгөөд Үндэсний статистикийн хороо салбар бүрийн дата засаглалыг хөгжүүлж, Төрийн нэгдсэн систем үүсгэхээр зорьж байгаа аж. Ингэснээр төр болон хувийн хэвшлийн шийдвэр илүү оновчтой болж, эдийн засгийн салбаруудын нөхцөл байдлыг бодитой үнэлж, төсөв хэмнэж, үр дүнд нь улс орны хөгжлийн үе шатыг хурдасгах боломжтой юм.

Төрийн байгууллагуудын өгөгдлийн сангууд тусдаа байршсанаас үүдэн зарим зорилтот бүлгүүд нарийн тодорхойлогдох боломжгүй байдаг. Иймд төрийн их өгөгдлийн сан байгуулагдсанаар албан бус хөдөлмөр эрхлэгчид, ажилгүй хүн ам, эмзэг бүлгийн иргэд, нэн ядуу, орон гэргүй хүн ам зэрэг тоон мэдээллээр баталгаажаагүй, төрийн үйлчилгээнд тэгш байдлаар хамрагдах боломжгүй бүлгүүдийн тоон мэдээлэл бүрдэх, улмаар тэдгээр бүлгийн нөхцөл байдал, хэрэгцээ шаардлагыг оновчтой тодорхойлох боломжтой болох юм.

Д.БАТ-АЮУШ