Энэ талаар Хөдөлмөр, нийгмийн хамгааллын сайд А.Ариунзаяагаас тодруулахад "Засгийн газраас журам баталсан. Тэр журам нь хугацаатай. Хүүхдийн төлөө сангийн зарцуулалтад хүүхдэд зориулсан бүтээн байгуулалт багтсан. Ажлын хэсэг ажиллаж, сонгон шалгаруулалт зарлана. Сангийн дансанд шилжүүлсэн мөнгөн дүнг нээлттэй мэдээлсэн" гэв. Харин Соёлын дэд сайд М.Батбаяр "Хүүхдэд зориулсан бүтээн байгуулалтыг дэмжих тусгай зориулалтын гэрээ байгуулж, Хүүхдийн төлөө санд хандивын мөнгийг шилжүүлсэн. Анх   хандивын тоглолт зохион байгуулахдаа тусгай зориулалтаар Хүүхдийн номын сан, Хүүхэлдэйн театрын бүтээн байгуулалт хийх зорилготойгоо төслөө танилцуулсан. Тиймээс ард иргэд хандивын аянд нэгдсэн.

Төрийн бус байгууллагын хувьд хандивын мөнгөөр Хүүхдийн номын сан, Хүүхэлдэйн театрыг барихад нэмэр хандив болно гэж ойлгож байна. Мөн Хүүхдийн төлөө сангийн данс руу хандивын мөнгийг шилжүүлснээр миний бие төрийн бус байгууллагаас гарах өргөдлөө өгсөн. Төрийн бус байгууллага нь гэрээний нэг тал учраас цаашдаа иргэдийн хүсэл зорилгыг илэрхийлэгч тал нь байх болно.  Хандивын тоглолтоор анх хоёр тэрбум 222 сая төгрөг цугларсан гэж байсан. Энд иргэн, аж ахуй нэгжийн амлалт орж буй. Бид сүүлд 150 сая төгрөгийн хоёр амлалттай хамт хоёр тэрбум 51 сая төгрөгийг шилжүүлсэн. Тодруулбал, "Макс" группийн ерөнхийлөгч Д.Ганбаатар 100 сая төгрөг шилжүүлнэ гэдгээ амалсан бол Ерөнхийлөгч асан Х.Баттулгын гараараа бичсэн каллиграфыг "НВЦ" компанийн захирал Ц.Баатарбилэг тухайн үед 50 сая төгрөгөөр худалдаж авсан. Тэр мөнгийг шилжүүлнэ гэдэг амлалт одоо ч хэвээрээ байгаа. Хандивын мөнгө өнгөрсөн хугацаанд арилжааны гурван банкны харилцах дансанд байсан. Учир нь төрийн бус байгууллага хадгаламжийн данс нээдэггүй" гэв.