Монголын 23 хүртэлх насны баг Тайланд, Малайз, Лаостой тоглоно

Нийслэл Улаанбаатар хотноо аравдугаар сарын 25-наас 31-ний өдрүүдэд Азийн 23 хүртэлх насны цомын тэмцээний урьдчилсан шатны "J" хэсгийн тоглолтууд болно. Тус хэсэгт манай 23 хүртэлх насны шигшээ баг Тайланд, Малайз, Лаосын шигшээ багуудтай учраа таарсан юм.

Өрсөлдөгч улсын шигшээ багуудын хувьд Монгол улсад хэдийн ирсэн бөгөөд “bubble” буюу "хөөсөн" системээр ямарваа нэг хүнтэй хавьталд оролгүй тоглолтоо дуусган нутаг буцна.

Өнөөдөр/2021.10.21/ тэмцээний албан ёсны өдрүүд эхэлж, багууд албан ёсны бэлтгэлийг тоглолт болох цэнгэлдэхэд хийж эхэллээ. Эхний бэлтгэлийг зохион байгуулагч Монгол улсын 23 хүртэлх насны шигшээ баг туслах дасгалжуулагч З.Баттулга, Ц.Энхжаргал нарын хамтаар эхлүүллээ. Тус шигшээ баг 10 хоногийн өмнөөс нэгдсэн цугларалтад гарч, бэлтгэл сургуулилтаа хангаж байгаа юм. Ахлах дасгалжуулагч Япон мэргэжилтэн эрүүл мэндийн шалтгааны улмаас нутаг буцсан ч цахим хэлбэрээр бэлтгэлийн үйл явц бүртэй танилцаж, заавар зөвлөгөөг өгч байгаа бөгөөд богино хугацаанд өөрийн тоглолтын арга барилыг тоглогч болон туслах дасгалжуулагч нарт сайтар ойлгуулсан гэдгийг албаны хүмүүс хэлж байна.

Манай улсын шигшээ багийн хувьд аравдугаар сарын 25-ны өдөр 11:00 цагаас Тайландын шигшээ багтай, 28-ны өдөр 11:00 цагаас Малайзын шигшээ багтай, 31-ний өдөр 15:00 цагаас Лаосын шигшээ багтай тус тус тоглоно.