Эрчим хүчний үнэ огцом өссөнөөр үйлдвэрлэл буурч, улмаар хөнгөн цагаан, зэс, цайр зэрэг металын үнэ дээд хэмжээнд хүртэл өсч байна. Мөн сүүлийн зургаан сарын хугацаанд Лондонгийн металын бирж дээр нөөц буурч, цаашид энэ байдал үргэлжлэх төлөвтэй байгаа аж.

"Газрын тос, байгалийн хийн үнийн өсөлт нь эрчим хүч их шаарддаг салбаруудуудыг үйлдвэрлэлээ бууруулахад хүргэж байна" гэж “CMC Markets UK”-ийн худалдаачдын зах зээлийн ахлах шинжээч Майкл Хевсон хэлэв.

Европт хийн жишиглэнгийн үнэ хэдхэн сарын дотор гурав дахин өссөн бол цар тахлын дараах эдийн засгийн сэргэлтээр буюу наймдугаар сарын сүүл гэхэд газрын тосны ханш 30 гаруй хувиар нэмэгдсэн байна.

Цахилгаан эрчим хүчний зардал ч огцом өсч, цайр болон бусад үндсэн метал үйлдвэрлэгч Бельгийн “Nyrstar” компани энэ долоо хоногт үйлдвэрлэлээ 50 хүртэл хувиар бууруулжээ.

Хятад улс бусад металлыг цайрдахад ашигладаг цайрын үйлдвэрлэлээ бууруулсан юм. Цайрын үнэ зөвхөн энэ долоо хоногт дөрөвний нэгээр нэмэгдэж, тонн нь 3944 ам.долларт хүрсэн нь сүүлийн 14 жилийн хугацаанд тогтоосон хамгийн дээд үзүүлэлт байв.

Мөн тээвэр, барилгын салбарт ихээр ашигладаг хөнгөн цагааны үнэ ч огцом өссөн байна. Хөнгөн цагааны үнэ энэ долоо хоногт нэг тонн нь 3215 ам.долларт хүрсэн нь 2008 онд үзүүлж байсан хамгийн дээд үзүүлэлтээс 200 ам.доллараар бага дүн аж.

Ухаалаг гар утас үйлдвэрлэхэд ашигладаг цагаан тугалгын үнэ өнгөрсөн Баасан гаригт түүхэн үзүүлэлт тогтоож, нэг тонн нь 37500 ам.долларт хүрэв. Энэ хооронд нэг тонн зэсийн үнэ 10 мянган ам.доллараас давж, тавдугаар сард нэг тонн нь 10747 ам.долларт хүрчээ.

Мөн энэ долоо хоногт никель болон хар тугалганы үнэ нэмэгдэв. “Oanda” компанийн шинжээч Эдвард Моя “AFP”-д өгсөн ярилцлагадаа "Дэлхийн эрчим хүчний хямрал олон үйлдвэрлэгчдийг гараа хумхихад хүргэж байгаа тул металын үнийн өсөлт ирэх долоо хоногт ч үргэлжилж магадгүй юм" гэжээ.

ЭХ СУРВАЛЖ: AFP