Цахим спортын ертөнц дэх хамгийн том тэмцээнүүдийн нэг “The International” буюу "TI"-ийн 10 дахь удаагийн тэмцээн Румын улсын нийслэл Бухарест хотод эдгээр өдрүүдэд болж байна. 40 сая ам.долларын шагналын сантай энэхүү тэмцээний аварга баг тодрох дөхсөөр.

Өнөөдөр/2021.10.15/ доод бүсийн ээлжит тоглолт аваргаа хамгаалагч "OG" болон Оросын "Team Spirit" нарын хооронд явагдаж, "Team Spirit" 2-0 гэсэн харьцаатай яллаа. Энэхүү хоёр тоглолтод Тува залуу “TORONTOTOKYO” буюу Александр Хертек “галзуурч” багаа ялалтад хөтөллөө. Өдгөө 20 настай тэрбээр эхний тоглолтод 20 аллага, хоёр дахь тоглолтод есөн аллага хийв. “TORONTOTOKYO” хоёр дахь тоглолтын дундуур "ez game" хэмээн аваргуудыг өдөөд амжсан.

МГУ буюу Ломоносовын нэрэмжит Москвагийн улсын их сургуулийг орхиж, цахим спорт руу эргэлт буцалтгүй орсон Александр Хертек энэ удаагийн "TI"-д тодорч байна.

Харин "TI"-ийн хоёр удаагийн аварга "OG"-ийн хувьд энэ хүрээд тэмцээнээ өндөрлүүлж байна. Хэдийгээр тэд дээд бүст шалгарсан ч "Secret"-д 2-0 гэсэн харьцаатай хожигдож, доошоо унасан юм. Тоглолтын дараа "OG" багийн тоглогч "Ceb" ярихдаа “Фэнүүддээ баярлалаа. Өгсөж, уруудах үе байх шүү дээ. Биднийг дэмжиж байсан та бүхэндээ баярлалаа. Тэмцээнээс илүү том зүйлийг бид олж авлаа” гэв.