Өвөлжилтийн бэлтгэл ажил хэвийн хангагдаж байгаа ч зарим аймагт өвөлжилт хүндэрч болзошгүй байна. Хүнс, хөдөө аж ахуй, хөнгөн үйлдвэрийн яамнаас өгч буй мэдээллээр энэ жил нийт нутгийн 80 хувьд зуншлага сайн байсан ч Хөвсгөл, Архангай, Завхан, Өмнөговь зэрэг аймагт өвөлжилт хүндрэх төлөвтэй байгаа аж.

Манай орны нийт бэлчээрийн 66.7 хувь нь 2021, 2022 оны өвөл хаврын улиралд хүрэлцээтэй гэсэн тооцоо гарчээ. Харин үлдсэн 33 хувь нь эрсдэлтэйд тооцогдсон байна. Иймд аймгууд өвс тэжээлийн хангамжийг нэмэгдүүлэх, тарга хүч багатай малыг зах зээлийн эргэлтэд оруулах ажил зохион байгуулах шаардлагатайг холбогдох албаны хүмүүс мэдээлэв.