АНУ-ын арми нутаг буцах хүртлээ 85 тэрбум ам.долларын хөрөнгө оруулсан ч афган цэргүүд огт байлдалгүйгээр талибуудад бууж өгсөн билээ. Тэгвэл өдгөө хуучин засгийн газрын батлан хамгаалахын сайд асан Абдул Рахим Вардакийн хүү Даоуд Вардак 20.9 сая ам.доллараар АНУ-ын Беверли Хиллсийн тансаг зэрэглэлийн харш худалдан авчээ.

Эх сурвалжуудын мэдээлж байгаагаар Даоуд 1977 онд төрсөн, “паштун ястны дүрвэгч” гэх бүртгэлтэй бөгөөд Флорида мужийн Майамид төвтэй “AD Capital” группийн захирал гэнэ. Мөн тэрбээр Майамид 5.2 сая ам.долларын амралтын газар эзэмшдэг аж. Харин шинээр худалдан авсан тансаг харш нь минималист хэв маягтай, шилэн ханаар нь Лос-Анжелес хотын тэнгэрийн хаяа жигтэйхэн сайхан харагддаг “Carla Ridge Residence” юм байна.

Даоудын аав Абдул Рахим Вардак бол Афганистаны үндэсний армийг үүсгэн байгуулахад гол үүрэг гүйцэтгэсэн мужахид дайчдын нэг агаад 2004-2012 онд батлан хамгаалахын сайд хийсэн хүн. Гэвч тэрбээр АНУ-ын цэргүүд нутаг буцахаас ч өмнө аль хэдийн Нэгдсэн улсад оччихсон байжээ.

Пентагон өнгөрсөн 20 жилд афган цэргүүдийг зэвсэглэж, арчилж, цалинжуулахын тулд 85 тэрбум ам.доллар зарцуулсан гэдэг. Гэвч зарим албаныхан афганы удирдагч нарыг цэргүүдийнхээ тоог худлаа мэдүүлж, илүү олон хүний цалин авч шамшигдуулдаг байсан гэж сэжиглэдэг юм.

Харин Даоудын ах Хамед АНУ-д цэргийн гэрээний “NCL Holdings” гэх компанитай бөгөөд Афганистанд хангамж хүргэх замыг аюулгүй байлгасныхаа төлөө Пентагоноос санхүүждэг байжээ. Мөн тэрбээр Майамид “Ludus Athletics” гэх брендтэй гэнэ.

Эх сурвалж: RT