Осло хотод болж буй чөлөөт бөхийн ДАШТ-ээс Монгол Улс гурав дахь медалиа хүртлээ. Тодруулбал, эмэгтэйчүүдийн 62 кг-ын өрсөлдсөн ОУХМ Э. Гантуяа Монголын чөлөөт бөхийн тамирчдын ДАШТ-ий түүхэнд 66 дахь медалийн эзэн болов.

Тэрбээр өчигдөр/2021.10.05/ эхний барилдаанаа дэлхийн аваргын хүрэл медальт, Пан Америкийн наадам болон Пан Америкийн аварга АНУ-ын тамирчин Кайл Мираклтай хийж, 4:14-өөр ялагдсан ч дагах барилдаандаа энэ жилийн залуучуудын дэлхийн болон Европын аварга Оросын бөх Алина Касабиеваг 12:8-аар ялсан юм. Харин хүрэл медалийн төлөөх барилдаанд Пан Америкийн аваргын хоёр алт, гурван мөнгө, нэг хүрэл медальт Бразилын тамирчин Лаис Нуньес Де Оливейратай тун хүнд барилдаан хийж 7:6-гаар ялав.

Медаль авсныхаа дараа Э.Гантуяа ярихдаа “Үнэхээр гоё байна. З.Дүвчин багш, шигшээгийн багш нартаа маш их баярлалаа. Зөндөө л багшийн хүчинд өдий хүрсэн. Ах эгч, хамаатан садан, Төв аймгийн Батсүмбэр сумынхандаа маш их баярлалаа" гэсэн юм.

Э.Гантуяагаас өмнө энэхүү жинд хөдөлмөрийн баатар, гавьяат тамирчин С.Батцэцэг, гавьяат тамирчин П.Орхон нар дэлхийн аваргын оргилд гарч, гавьяат тамирчин О.Насанбурмаа 2011 онд хүрэл медаль хүртэж байв. Тэгвэл Э.Гантуяа эгч нарынхаа амжилтыг үргэлжлүүлэн хүрэл медаль авч, дэлхийн медальтан боллоо.

Бусад бөхчүүдийн тухайд эрэгтэйчүүдийн 97 кг-ын жинд хүч үзсэн ОУХМ Ө.Батзул шагналт тавдугаар байрт оров. Тэрбээр хүрэл медалийн төлөө Ираны тамирчин Можтаба Голейжтэй хүч үзэж оноогоор цэвэр (0:10) ялагдсан. Мөн эмэгтэйчүүдийн 50 кг-ын жинд Д,Отгонжаргал, 76 кг-д Н.Загардулам нар өнөөдөр дагах барилдаан хийнэ. Харин олимп, ДАШТ-ий хүрэл медальт ОУХМ Б.Болортуяа, залуу тамирчин Т.Энхжин нарыг ялсан бөхчүүд шигшээд шалгараагүй тул үзэгчдийн суудалд шилжив. Токиогийн олимпийн хүрэл медальт Б.Болортуяагийн хувьд эхний шатандаа гоц мөргөсөн ч хоёр дахь барилдаанаа Туркийн бөх Зейнеп Йетгельтэй хийж, цэвэр ялагдсан юм.

"Осло-2021" ДАШТ-д эрэгтэй баг маань 56 оноогоор зургадугаар байрт орсноор ирэх жил Дэлхийн цомд оролцох эрхээ авлаа. ОХУ, АНУ, Иран тус бүр 3 алттай багийн дүнгээр тасархай тэргүүлэв.